江若琳發狂咬青雲「鹹鹹哋」

劉青雲、江若琳(Elanne)及萬綺雯等前晚出席新片《追凶》首映,陳柏宇則拖女友符曉薇到場搶鏡。Elanne表示片中要發狂咬青雲:「第一次同青雲合作,不嬲鍾意佢,佢係好男人。今次要咬佢手臂,起初好驚,後尾青雲叫我放膽咬。(味道點?)鹹鹹哋,可能天氣熱。我演自閉少女,有場好危險嘅火海戲,阿媽一早幫我買晒保險,但角色令我拍到喊。(驚似薛凱琪有情緒病?)唔驚,唔知有冇保險包呢種,但由細到大我黐黐哋,阿媽好放心。」

而青雲安排太太郭藹明進場睇戲,但未讓她亮相台前,他說:「太太怕怕哋睇鬼戲,呢套唔係鬼,係恐怖。(老婆撇甩你睇Lady GaGa?)我唔係太鍾意睇演唱會,況且佢哋成班女仔會玩得開心啲。」他又大讚導演彭發:「佢搵到童話呢個Point包裝套戲,好有鬼才。遲啲會同彭氏兄弟合作關於拯救題材嘅災難片。(同謝霆鋒新片撞題材?)唔驚,市場咁大。(鋒芝傳復合?)好事,一家團聚,呢啲留番佢哋決定啦!」

萬綺雯(左起)、劉青雲和江若琳合作拍新片。

陳柏宇拖女友符曉薇睇首映搶鏡。