周倩圯飾情狂

模特兒周倩圯對首飾情有獨鍾，經常穿梭不同名店或舖仔「獵艷」，更會在世界各地搜羅獨特款式，至今已收藏逾百款，笑言全都是無價寶，絕不會割愛！

自小已很貪靚的周倩圯（Samantha），回想這些年瘋狂地買，只能用「得啖笑」來形容：「我小學一有零用錢就會『買買買』，飯可以唔食，首飾唔可以唔買！總之頸鏈、耳環、手鏈同戒指乜都買餐飽！可能細細個見到媽咪戴首飾，雙眼就會發光，覺得好靚好靚！之後就會趁媽咪唔喺屋企嗰陣偷偷攞嚟戴，日日如是，諗起都好笑。」

不過因一次搬家，令Samantha痛失所愛，對家人不瞅不睬一星期，她說：「爹哋媽咪唔知我將全副身家用嚟買首飾，我自以為聰明，放喺一個頗殘嘅紙盒內，就以為唔會被發現，點知被誤以為係垃圾，我當時喊到七彩！佢哋當時點氹我都冇用，我喊住一支箭跑去垃圾房搵，可惜送垃圾車車尾，全都運晒去堆填區，認真心痛！」自此之後，她笑言不再收收埋埋，繼續儲錢去買：「唔知係咪要作出補償，爹哋媽咪三、兩日就會買小飾物畀我！」

拒要求男友送

隨着年紀增長而收斂，Samantha透露不會再胡亂入貨：「邊戴得咁多！」她表示不會獨愛鑽飾與名牌首飾，亦會到旺角女人街搜羅精緻款式：「幾十蚊我都會買！為咗襯衫試過一口氣買咗十對同款唔同色嘅水晶耳環，埋單二百蚊有找。」她亦不會要求另一半或朋友送贈，皆因未必啱心水，又會自行到世界各地搜羅所愛，至今已擁有逾百珍藏，問到如何收藏？她說：「我會買一個個透明盒又或者Keep住原有盒仔，得閒都會攞出嚟欣賞。」問到會否割愛……問題還未說完，她即二話不說地Say No：「全都係無價寶！」

每周出巡

論最心動的飾物，Samantha首選Chanel耳環，她笑言每星期均到店內覓心頭好，看看有否新貨：「連售貨員都熟埋咁話！」

童心未泯

周倩圯童心未泯，對卡通人物的耳環更情有獨鍾，愛不釋手！

點保養？浸水消毒風乾

周倩圯對每樣珍藏都很愛錫，為令「它們」壽命更長，有着自我一套的保養方法。平均兩個月她便會將每樣「寶貝」先用微暖水浸5分鐘，再以開稀的消毒藥水潔淨，最後用棉花抹乾，放在通風地方自然地風乾，但要謹記避免陽光直接照射。只要保養得宜，每件佩飾自然可更歷久常新。