Ga添8大香港Icon

百變天后Lady GaGa來港開騷反轉香江，期間多次曲線地宣傳「香港八大Icon」，就連「香港多A貨買」這個不能說的真相也大事宣揚，加上一記「腿張開」下體磨「I Love HK」Tee冧粉絲，印證這位百變天后對香港之鍾情，建議新一屆政府應頒予大紫荊勳章褒揚她對香港的貢獻！

Icon 1：港女

好多真正嘅港女都唔認係港女，GaGa金髮碧眼，一睇就知佢都唔係，但開騷時依然好冧咁話：「我係港女！」連國際天后都咁Pound of呢個名詞，港女快啲認祖歸宗啦！

Icon 2：馬場

GaGa可能知香港馬迷多，開騷一出場就當亞博係馬場個沙圈，坐獨角獸車繞場一周，睇到小怪物嘩鬼叫！呢場邊個Win得，梗係買GaGa獨贏喇！

Icon 3：肥牛火鍋

香港人愛打邊爐，「冇肥牛放枱，慘過褲穿袋」，GaGa着牛肉衫嘅癖好，正符合港人愛吃肥牛嘅性格，睇見咁大隻「肥牛」跳嚟跳去，真係想一啖食佢落肚。

Icon 4：主題公園

GaGa呢個大耳朵造型似米奇老鼠又得，似複製羊多莉都得，若然佢肯喺主題公園Cosplay扮動物，相信強國人民必定買飛入場，一睹佢維妙維肖嘅扮相。

Icon 5：劏房

香港劏房舉世馳名，GaGa都入鄉隨俗，將亞博騷舞台「劏」到係巡迴騷中最細一件，仲將古堡斬件拆開成其他布景，盡顯最小空間發揮最大效用，將劏房真正意義發揮得淋漓盡致。

Icon 6：軍器廠街

金鐘與灣仔交界有條軍器廠街，係警察總部所在地，若然「一哥」見到GaGa揸住支機關槍如此英姿颯爽，大可以請佢過檔維持治安，做御林軍一定嚇得吓人。

Icon 7：幻彩「Fing」香江

一個人將愛推向極至，就會同佢合而為一，GaGa唔單止將香港區旗Fing來Fing去，仲興奮到攝入底褲，用自己身體同香港融為一體，真係好過喺維港將激光射嚟射去咁介紹香港，製造光污染。

Icon 8：黨派

睇GaGa騷有個潛規則，絕不能牛記笠記到場。小怪物有見及此，造型要幾騎呢得咁騎呢，尤以腩肉橫飛的「泛腩」陣營及周身花喱碌的「身紋黨」鬥爭最為激烈，百花齊放。