楊梓瑤狂晒城績魔迷鬧八婆

英超勁旅曼城於打吡戰中擊潰曼聯而登榜首，身為曼城Fans的「浸大E神」楊梓瑤未開波已力撐好波，招來「紅魔」粉絲辱罵八婆，氣得她扯火還拖鬧對方冇品，還要求對方立即取消她的關注！

昨晨上演今季英超中最重要一場榜首大戰－曼城對曼聯，曼城最終主場以1：0小勝同市「死敵」曼聯，重奪榜首之位，連牙骹都贏埋，一吐近月烏氣。身為曼城死硬派粉絲的楊梓瑤（Carol）雖要趕校內功課但仍支持愛隊，連覺都唔瞓睇直播，還於開波前在微博留言：「曼城好波！」想不到向來「好波」的Carol只是簡單一句讚美，卻換來「紅魔鬼」粉絲辱罵「八婆」！

「真係好冇品」

未知是否因曼聯輸波失榜首優勢，有內地「紅魔」粉絲見Carol在微博搖旗吶喊，即於其微博留言：「所以叫你去吃屎咯8婆！」此話一出，「童鞋」力撐偶像有選擇捧喜歡球隊的自由，要求對方道歉，至於Carol見到留言亦佛都有火，即時在微博還拖：「你們沒事嗎，我不能有自己支持和喜歡的球隊嗎？我就是支持曼城！那又怎樣！趕快取消我關注，我沒有這麼沒有品的粉絲！」實行下逐客令。

對於慘被辱罵八婆，Carol昨日受訪時勞氣地說：「睇完段留言真係唔開心！你哋個個鍾意曼聯，唔代表我都鍾意，我又冇鬧佢哋隊波，只係抒發感受都畀人鬧，唔Buy我睇法唔緊要，但唔好惡意中傷囉！真係好冇品！」她強調文化各有差異，大家應尊重別人的觀點，至少不可作人身攻擊。

另一邊廂，身為「紅魔」Fans的周秀娜為愛隊輸波「哭波喪」，與曼聯鐵衞里奧費迪南分屬好友的她，前晚還搭男友Avis下注曼聯客勝，可惜愛隊僅敗，氣得她鬧爆男友搭沉船。身在天津的娜姐昨日接受長途電話訪問，盡顯野蠻女友本色，她說：「真係好慘囉！無啦啦輸畀曼城，因為我要趕去天津，咪叫Avis幫我買少少支持紅魔囉！點知佢又再買多啲，搞到搭沉船，我唔理，要佢賠番畀我！」