小谷佗B驚變喜

六個月前，就連小谷也不敢想像自己將為人母，晚晚夜瞓，身體未準備好；為人粗魯，心理上仍未Ready！上天一個突如其來的恩賜，身心要承受小生命的來臨，對小谷來說就只有三個字—不習慣。

六個月的懷孕日誌，盛載小谷對生命態度的轉變，就像看盡三世哀榮，驚喜盡在不言中，她說：「六個月變化真係好大！心理生理變化到連自己都估唔到！頭兩個月真係好唔慣！我真係冇Plan過，冇諗過咁快生BB，一直都想趁後生享受多啲二人世界，繼續玩多啲，醫生話我有咗，真係始料不及！開頭驚多過喜。有時真係唔記得自己有咗！仲成日走來走去，行事大動作，坐到好粗魯。」

BB似小雪人

未懷孕前，小谷生活雲展雲舒，想這樣做這樣，從來都是靠掌管感性的右腦行事。直至肚子愈來愈大，漸漸意識到自己是一個孕婦，更知道左腦要開始運作，做一個好媽媽，她說：「到第4、5個月，我就開始擔心，擔心BB健康問題，擔心BB手腳齊唔齊全，真係驚到瞓唔着！但自從第一次照超聲波，見到BB手指腳趾都喺度，個頭仔又啱比例，真係安樂晒！」

超聲波下，首次見到自己跟老公的愛情結晶品，小谷赫然發現生命已航向彼岸，一股莫名的感動湧上心頭：「見到BB似一個小雪人，眼前不敢相信佢係我嘅BB，到依家都未知道佢性別，因為唔想咁快揭曉呢個謎思，所以叫醫生唔好講畀我同老公聽。見BB一刻，我冇喊呀！反而老公就眼濕濕，佢仲好老土咁話有沙入眼，你呃我，醫院何來有沙呢？哈哈！」

夫婦戒陋習

如今小谷將要面對十級痛楚，等待小生命呱呱落地，從不習慣到驚恐，再到現在的期待，不禁令她高呼：「我要做媽咪喇！」小谷說：「我已Ready好做一個好媽咪，已經問晒身邊人邊間學校好，仲成日同老公講數，要戒晒所有壞習慣，最起碼我唔可以再咁粗魯，亦唔可以再咁夜瞓，我只想BB健健康康！」

每當賦閒在家，與老公鄰椅而坐，話題總離不開小朋友的將來，想到將來的種種，小谷雙眼如星，散發無限柔情：「我唔會逼小朋友一定要做鋼琴家或者科學家，但佢想學乜想做乜，我都會盡量滿足佢，無他，因為佢係我嘅生命！」大概只要BB是個開心快活人，那理得他或她將來是富是貧！

後記：最衰你！

小谷跟小記認識多年，一直擔任小記的感情顧問，每遇感情的奇難雜症，她定當如實回答，不怕Hurt人。如今小谷腹大便便，未當過媽媽的她卻四出找生仔顧問，一句：「最衰你未做爸爸，如果唔係一定問你，我鍾意聽多啲！」