周秀娜眼火爆追魂Call「捉姦」

周秀娜男友陳偉成與模媽Mia的「床戰」如箭在弦，兩人日前更當娜姐冇到，私下約會「培養感情」，娜姐得知後使出「奪命追魂Call」，搞到他勁冇癮，最後嬲爆爆接載Mia返閨，更發晦氣指隨時辭演！

因堅持與模媽Mia（陳靜儀）床戰而辣廢女友周秀娜的陳偉成（Avis），雖遭女友下禁慾令嚴懲，但依然冇有怕，日前更夜會Mia談心！當晚十時許，Avis與Mia踎旺角街邊檔，刻意揀暗角位，但她打扮性感騷四吋事業線，更向Avis施展冧功，包括俯身送秋波、輕托香腮及撥弄秀髮，擺明當娜姐冇到！起初Avis頗為受落，兩人更不時細聲講大聲笑，可惜電話突然響起，未知是否娜姐「駕到」。他見狀即離座往無人處「頭耷耷」講電話，被冷落的Mia只好冇癮地玩手機。

隊檸茶降火

數分鐘後，Avis返回座位，正當Mia再施冧功之際，「追魂Call」又再響起！他兩度離座講電話躁到爆，頻頻指天篤地！約五分鐘後，Avis返座位兼狂飲檸茶降火，更一支箭標往埋單，被躁爆Avis嚇窒的Mia惟有執拾行裝死跟，離開時卻撞正落雨，兩人只好暫避，Mia體貼地為他抹去身上雨水。最後，Avis出動「溝女戰車」接載Mia返閨，再獨自往便利店買啤酒，看他面燶燶離開，估計是與娜姐吵大鑊。

未簽約擬辭演

記者向Mia求證，問到Avis為何動怒，她隱晦地說：「唔知啊……淨係知娜姐係咁打畀佢。（嬲你哋背住佢約會？）唔係呀！我哋為《喜愛夜蒲2》對稿咋！人夫不可愛呀！（Avis好慶喎？）問番佢啦！」Avis則直認娜姐急Call兼吵大鑊：「主要係接戲份方面有分歧，我嗰日係躁咗啲。（娜姐咁嬲點搞？）反正未簽約，細節又未傾，拍過第二套囉！」而遭Mia剃眼眉的娜姐，則發火指懶理兩人密會，但被問到會否逼Avis辭演時，她沒好氣地說：「咁大個人冇得逼，唔通用槍指住佢個頭？」娜姐指不會向公司自薦取代Mia與Avis床戰：「我啲期好爆！」