小鵬露底不敵大鵰祥

阮兆祥日前與陳展鵬為新劇開工，到後巷拍攝一場赤裸上身的追逐戲。減肥成功的祥仔應導演要求穿上超細碼泳褲，頓時「大鵰」現形，令展鵬慘被比下去！

由阮兆祥、陳展鵬與田蕊妮等主演新劇《Chok氣一族》，尚有兩星期便拍畢。日前，祥仔、展鵬與喬寶寶等到九龍城一條後巷取景，眾人赤裸上身僅包毛巾，被扮演黑幫的臨記追殺。期間，展鵬與祥仔不小心飛甩毛巾露打底褲，穿上細碼泳褲的祥仔營造出下體激凸效果，睇到展鵬與劇組眼凸凸！

細碼泳褲晒堅料

問到祥仔曾否在街上赤裸演出，他說：「拍廠景就試過，所以初初知道拍街景都有擔心，叫導演唔好安排喺大街大巷跑！」提到泳褲勁Sexy，祥仔笑說：「因為導演同我講驚穿崩，所以叫我搵啲細碼褲。（係咪真材實料？）吓！我唔明呢個四字詞語，唔係好識答！（好激凸？）總之佢叫我條褲要細條，我最細條就係呢一條。」

第二次跟祥仔合作的展鵬，雖然打底褲不及對方獨「凸」，但上身肌肉則Fit過祥仔，更吸引女學生索簽名及合照。問到事前有否操弗，展鵬說：「冇呀！本來都想做掌上壓但冇時間。（赤裸上身係極限？）唔係！如果遇到好劇本，都唔介意露股，但電視尺度唔得。（想拍電影？）乜都想，總之睇劇情需要囉！不過好似柯震東咁喺戲內狂露就太多，要適可而止。」