盈盈樂樂甜蜜第一翹終認有親

秘戀多年的錢嘉樂與湯盈盈，向來不愛在人前煙韌，昨日竟趁愚人節賣大包，來幕甜到漏的「世紀翹手」！而吳卓羲女友張馨予亦在微博自爆喜訊，公告天下：「我要結婚了！」

拍拖多年的錢嘉樂與湯盈盈雖已是公認的一對，但一直愛得低調，甚少在人前晒恩愛，惟二人的圈中密友近日相繼結婚，更在嘉樂好兄弟洪天明的新婚派對上被催婚，二人才開始不避忌，把另一半掛在口邊。

萬料不到昨日趁住愚人節，拍拖出席《展步同行暨面具創作比賽頒獎典禮》的盈盈與樂樂來個「大躍進」，首度翹手見傳媒！平日紮紮跳的盈盈在男友身旁即變「鵪鶉」，要樂樂主動伸手才害羞地翹着他的壯臂，樂樂見狀不禁取笑女友：「佢怕醜，今日又唔係翹手日，但都尊重記者要求。本來我要去開工，為支持姪仔（錢景峰）先到一到。」

拒呼「老婆」

記者起哄稱盈盈為他的「老婆」，他即否認：「唔係老婆，唔係未婚妻，係女友，咁快叫到咁盡，我就慳番求婚嗰步！」問到何時擺酒，他笑言被洪天明嚇親：「佢話好多人等住玩我哋，我會咁傻？不過被玩都開心嘅，但佢（盈盈）應該諗吓平日對人做咗啲乜！」公開被呼「女友」的盈盈一臉冧爆，卻口不對心說：「我哋Friend嚟啫！今日係為慈善出力。」對於男友叫她反省，她反問：「我玩得好盡咩？」

而昨日的喜事豈只盈盈樂樂晒幸福一樁？吳卓羲女友、內地乳模張馨予昨午突然在微博爆婚訊！她寫上：「我要結婚了！他是……」趙碩之留言「搭訕」，自稱要跟張馨予結婚，並着大家叫她「張太」。約1小時後，張馨予才自揭大話：「他是……愚人節！哈哈，節日快樂！」未知是否恨嫁恨到發燒，但她去年曾上載床照到吳卓羲微博「踩場」，令對方一身蟻！

「唔好玩我啦」

前車可鑑，記者致電問吳卓羲是否知道女友的惡作劇，他9秒9劃清界線：「唔知喎！我冇睇佢微博，今日愚人節吖嘛！唔好拉我落水！（明講或暗示結婚？）冇講過，唔好玩我啦！」他再三強調女友只是開玩笑，對文中的「他」不願置評，並無奈表示已收到不少朋友的整蠱電話，過了一個「充實」的愚人節！