周永恒寶貝女一級燙傷

唱作歌手周永恒（Roy）的寶貝女信希前日被熱蔗汁燙傷額頭和左面，嚇到媽咪趙頌茹（阿Yu）狂喊，醫生指信希屬一級燙傷，Roy則擔心囡囡面部留疤痕而變成「鍾無艷」。

周永恒前晚在微博透露1歲半的女兒信希被熱水燙傷，額頭和左面又紅又腫。昨日他接受本報電話訪問時說：「囡囡自己攞枱上面嘅熱蔗汁飲，可能個杯太重，佢唔小心就倒瀉咗，淥傷額頭同左面。」當時只有阿Yu在家，兩母女攬住狂喊，Roy接到通知後即召喚救護車送囡囡入院。

最驚變鍾無艷

前晚Roy接囡囡返家，阿Yu擔心到整夜失眠，他說：「醫生話一級燙傷，我第一句問會唔會有疤？好彩醫生話應該唔會，不過都諗住問吓高皓正嘅醫生老婆，有乜藥搽吓好啲！」本來醫生提議囡囡留院，惟政府醫院不能陪過夜，兩公婆擔心護士為免囡囡抓面，或會綁着囡囡的雙手，故寧願接囡囡出院返家親自照顧。

Roy自責沒有好好照顧囡囡，盼望她早日康復：「我個女咁靚，變鍾無艷就慘喇！佢依家包到成個Lady GaGa咁，今日塊面仲出咗水泡，真係肉痛死，陰功豬！老婆都好內疚，我安慰話唔關佢事，冇人想發生意外，以後我哋會小心睇住囡囡。」