天明爆粗鬧情敵借老婆溝姐仔

剛娶得周家蔚的洪天明，昨日即大振夫綱，在傳媒前怒斥老婆前度男友、前港姐王愛倫兒子林建億（Chester）當晚婚宴「踩場」：「佢周圍溝女，仲用水潑濕家蔚！」更爆粗鬧對方是「X街」、「X人」！

新婚燕爾的洪天明與老婆周家蔚日前剛宴請不少圈中好友開Party，昨日錄影節目《千奇百趣高B班》原本攬到實，眾人以為是兩夫婦冤氣，但實情是家蔚正勸天明不要爆大鑊！以尊嚴行先的天明突然在傳媒面前取出手機，展示名為「Chester Lim」的Facebook並說：「呢個真係X街嚟，我要開名講！呢個人同家蔚拍過拖，我哋結婚Party，佢不請自來！有冇做人情，我唔想知，但就冇講句恭喜，嚟到周圍溝女攞電話，要唔要面o架？仲淋到家蔚濕晒，乜人嚟o架？溝女死遠啲啦！（點解唔當場處理？）我起初以為係家蔚請佢，後來先知唔係！如果唔係我當場喺佢塊面耍套洪拳，正一X人。」

洪：正一×人

天明爆發完仍氣憤難平，希望外界認清「X人」真面目，他說：「我呼籲畀咗電話呢個人嘅朋友，盡量唔好同呢個人接觸，自己小心！（係咪Chester傷害過家蔚？）呢啲係佢哋之前拍拖嘅事，唔使追問，但到我同家蔚拍拖，佢都有煩住家蔚，搞到我好躁！（係咪你介入人哋？）唔關事，我同家蔚都好清楚。」

林：有畀人情

天明喪鬧期間，家蔚一直躲在錄影廠外，事後記者追問她才解釋。家蔚表示Chester是選完港姐後認識而拍拖，維持半年後因辯論人生議題有不同立場，最後搞到分手，其後曾求復合但被她所拒。問到Chester是否不請自來？家蔚說：「係表弟請嚟，我都唔知！我同天明講明唔請前度，嗰晚見佢都問佢做乜喺度。（搵水潑你？）佢係整跌杯水，整濕我件衫，知佢係唔小心，本來想大事化小，但我尊重老公。」

記者就此事聯絡Chester，他昨日以電話回應：「我澄清唔係不請自來，係同Janet（家蔚）親友一齊去，亦有畀人情。我講嘢大動作，水濺到佢，朋友可以做證。（天明話你猛溝女？）正常社交，男女都有傾。總之四年前分手後，我哋一直係好朋友，若果人哋唔開心，我好抱歉。」