高海寧馬國明打拚出頭天

電視台進入混沌年代，並非單靠Aggressive便能夠一本萬利，高海寧（高Ling）和馬國明同樣靠着一股傻勁勇往直前，成就今日的姐仔、小生。但各有前因莫羨人，高Ling曾慘到住天台屋；馬國明則衰到長期做「跑龍套」，臨急抱佛腳的進取原來未必有用。

請數出現役三色台最性感的姐仔，三、二、一……閣下所選的頭三位必有高海寧的份兒！當電視台陷入亂局，甚麼視后視帝只是虛名，真正搵到食的，高Ling是其中一個，她憑甚麼？連她也說：「人哋覺得我身材好，所以多咗好多工作機會，我認㗎！」

「絕食」保身材

的確，高Ling身材已臻男人愛慕，女人羨慕的地步，多一分太大，少一分卻嫌不夠，她說：「係未Perfect！不過我好滿意自己身形，勝在夠平均，係下半身偏肥少少，所以我會用盡任何辦法減！我試過7日唔食嘢，又試過齋食麥皮一個月，真係Work o架！」她的「女為悅己者瘦」政策看似進取，但實情她是一個「鱷魚頭、老襯底」的傻大姐，從不計較做蝕底的事，她說：「我唔係Aggressive嘅人，見過好多人為上位不擇手段，但我唔識，好彩總係遇到貴人，可能傻人有傻福啦！」

高Ling今天的成果，看似唾手可得，其實她有過一段鮮為人知的苦日子，當日播下種子，成就她今天的性格，高Ling說：「細個爹哋、媽咪唔喺我身邊，所以跟婆婆住，因為舅父係軍人，所以家教好嚴，為咗得到別人疼愛，我比其他小朋友乖，就算係表妹錯，我都要讓佢！每日生活好似軍訓，養成安分守己嘅性格。但因為冇爹哋、媽咪日日陪住我，有時真係覺得有啲自卑。」

自卑住天台屋

然而，自卑的性格沒有因為年紀愈大而消減，一個窮字，令高Ling一世難忘：「12、3歲跟番爹哋、媽咪住，仲要住天台屋！我一直希望父母過好啲，唔使再喺女人街擺檔，好想開間舖頭畀佢哋做小生意！」

沒有以愛情為名的「胭脂」作潤飾，外表驚艷的高Ling，內裏卻Dry到爆，她說：「我係恨拍拖嘅，但一拍拖就會分心，所以唔識揀。不過我依家已經被玄彬分心喇！睇完佢套《秘密花園》，日日都掛住佢；我亦好欣賞劉青雲呢類咁錫老婆嘅男人，我想要嘅男人就係呢兩類！」

無綫小生馬國明（馬明）入行十二個年頭，一向給人與世無爭的形象，他說：「我性格被動，又唔Aggressive，有一次我出席劇集宣傳活動，影大合照時匿埋喺角落頭，監製即刻拉番我出嚟，話我既然係第二男主角，做乜鬼要匿埋！唔少前輩亦話過我唔應該過分內斂！」自此以後，馬明懂得於適當時候顯出男主角應有的風範，他說：「依家影大合照，我識得企中間！」

做茄喱啡仍感恩

馬明如此謙虛內斂，其實全因前輩黎耀祥的一番話，他說：「7、8年前我返內地拍《同撈同煲》外景，當時祥仔係我同房，佢話娛樂圈三成靠實力、七成靠運氣！既然好多事我哋控制唔到，咁不如隨遇而安！」藝員訓練班出身的馬明，初入行時做足三年跑龍套，仍自覺非常幸運：「我都係做咗三年路人甲乙丙，就有機會拍重頭劇《衝上雲霄》，但有啲同屆嘅同學、師兄做咗成十幾年都仲等緊機會！」

最近馬明憑《On Call 36小時》的「一件頭」贏盡觀眾掌聲，網民力捧他做視帝，他卻自爆貪錢多過貪獎：「去爭獎，不如去賺錢！其實我一直都想返內地拍劇搵人仔，內地收視郁啲過億，但香港最多都係幾百萬！」

侍母至孝想閃婚

馬明如此想搵「真銀」，原來皆因有顆孝順的心，他說：「我一直想搬大屋！（結婚後都同家人住？）一定！」

38歲的馬明當然渴望結婚，但奈何仍未遇上「Miss Right」，單身的他笑說：「我接受閃婚！」不過必須先得母親大人的同意，他說：「每次拍拖我都一定會帶女朋友返屋企見家長，婆媳關係好重要，我最怕成為磨心！阿媽係一個易相處嘅人，如果佢都唔鍾意嘅話一定有問題，一定唔會同佢發展！（點先得到伯母歡心？）其實斯文就得，紋身、穿鼻環No Way！（你有咩要求？）性格一定要爽快！我最怕扭擰嘅女仔，因為唔知點服侍佢，哈哈！」

後記：律己以嚴

有個軍人做舅父，高Ling的紀律亦嚴明得令人汗顏。訪問當天，高Ling老早已出門口，途中去到哪裏，也自動波和盤托出，可惜不幸遇上塞車，最後也只僅遲一分鐘，她即連忙賠不是，還嚷着要請食飯。但小記想講的是，是你錯麼？錯就錯在香港交通太繁忙。

後記：實際至上

馬明向來樸實無華，從不追求名牌的他於訪問當天亦只是以「牛記」、「笠記」現身拍攝場地。即使貴為一線男主角、擁有一台掃把佬座駕，他仍堅持乘坐港鐵，連趕幾場訪問的他笑說：「揸車難搵泊車位嘛！又趕時間，梗係坐港鐵方便啦！」如此實事求是的性格，當真令人佩服！