莊思敏愛復古愛大袋

名牌手袋擁有無窮魔力，不少女士視之為寶貝。模特兒莊思敏對手袋的款式和配搭，自有一番見解，偏愛復古味道皮袋的她，亦收藏不少名牌包包，若將她全數手袋展示出來，相信會令人猶如置身二手手袋店中。

莊思敏（Jacquelin）自問不算「袋癡」，家中卻收藏不少名牌靚袋，她說：「十幾歲開始買袋畀自己，但冇話特別儲，中學唔識Keep、唔識處理，搞到啲袋好霉。」長大後，她偏愛帶復古味道的皮袋：「最近心頭好係一啲Vintage嘅袋，例如80年代款式，價錢平啲之餘，款式又唔會同人撞。我本身鍾意用大袋，因為出街帶好多嘢，手機、化妝品之類，所以個袋要有番咁上下Size，反而細袋要去Event先用到。顏色方面，都係買深色、黑色咁，容易襯。」

問到追求者或男友曾否以名袋相贈博取歡心？Jacquelin坦言：「有試過，例如嗰排我特別鍾意某個品牌，對方就會送畀我，但我好怕收貴價手袋，驚自己唔鍾意就唔會用，所以對方最後會連埋張單一齊送，等我唔鍾意時可以攞去換款。」她透露家中「袋蹤處處」，常用的只有十多個：「啲袋有大有細，我買袋心得係揀容易襯衫嘅，我好懶，通常個幾兩個星期唔換袋，最近就鍾意用保齡球袋，去旅行就會用背囊。」

屢遇鎅袋狂徒

Jacquelin還自爆曾被鎅袋的恐怖經歷：「試過幾年前喺銅鑼灣畀人鎅袋，係布袋嚟，返到屋企先知，又試過去旅行住酒店，畀人鎅咗行李篋，好彩佢鎅嗰度只係擺日用品，冇咩貴重嘢。」

談到至愛手袋品牌？Jacquelin即答：「最鍾意Chanel！近呢幾年好鍾意，佢啲皮好用，可以Keep得好好、用好耐，回收價值又好OK。其實好多牌子嘅袋都好貴，自己最貴嗰個成10萬蚊！」

得阿媽「傳承」

「呢個白色手袋係媽咪買嘅，屬於90年代款式，但佢買咗之後從來冇用過，有次執屋，畀我同阿妹發現，跟住就由我開齋用咗！不過白色好難Keep，會染到其他色，好心痛o架！返唔到去最初隻色。」

同GaGa品味一致

愛美是女人天性，對袋款的愛好程度更是日新月異，但要數最有特別意義的手袋，Jacquelin立刻可挑選出來：「呢個係80年代出嘅化妝箱，二手o架！裏面可以擺好多嘢，價錢唔係太貴，幾千蚊左右，我買嗰時個店員仲話Lady GaGa都有，可謂近期最愛呀！而且仲好高『收視』，每次出街都好多人望。」