吳尊任達華 型戰「峰」頭躉
韓國型男高修及索女韓彩英前晚赴台出席派對，但受歡迎程度不敵青靚白淨的台灣紅星吳尊，而香港熟男任達華亦全程畀女圍，齊齊做人肉布景板，任影唔嬲！
國際殿堂級品牌Christian Dior位於台灣101的全球最大旗艦店，前晚舉行開幕派對，嘉賓包括來自香港的楊紫瓊、吳彥祖、任達華與琦琦、韓劇《聖誕會下雪嗎》的型男高修及《花樣男子》女星韓彩英，以及台灣紅星吳尊、楊謹華及張鈞甯等。當中以身穿低V晚裝的楊紫瓊及韓彩英最性感，但論受歡迎程度則不及吳尊與任達華，兩位型男整晚畀女圍，而他們亦來者不拒，被讚靚仔又友善！
送禮物賀全智賢
剛巧在高雄與陳妍希及吳君如等拍戲的任達華，專程趕往台北赴會。對於曾合作的韓星全智賢即將出閣，華哥表示不知道她拍拖：「拍戲時成日一齊玩，佢係好女仔。」他透露稍後會到韓國做後期工作，問到會否買結婚禮物賀對方，他說：「上次佢哋成班人去澳門拍戲時，買咗好多杏仁餅做手信，但佢份結婚禮物係另一樣嘢，唔係杏仁餅。（叫佢快啲生小朋友？）會，佢成日讚我個女靚，話似我。」
吳彥祖全力造人
至於吳彥祖則表示太太Lisa S.很忙，故沒有同行，談及造人大計，他說：「我之前10個月都唔喺香港，冇時間造人，今年應該可以。」他還表示很想與楊紫瓊合作，但一直未有機會，並大讚台灣演員阮經天有潛質：「見到佢就諗番當時嘅我，佢拍完《艋舺》後就留意佢，想同佢合作。（你少做幕前？）係，慢慢退出做幕後。」
谷出「湯碗胸」的韓彩英，穿上低V晚裝搶風頭。
型男任達華（左二）與吳尊滿場飛，大受女賓客歡迎。
韓國型男高修Keep住Cool樣，最多只是微微笑。
老公任達華畀女圍，琦琦亦不愁寂寞，四出Social。
擔任表演嘉賓的林憶蓮，演出贏盡掌聲。
台彎女星張鈞甯未有拋胸迎戰，僅露出香肩。
吳彥祖與楊紫瓊為新店剪綵，並齊齊舉杯慶祝。