天明隊冧自己滾搞家蔚
洪天明及周家蔚前晚舉行婚宴派對後，昨日繼續開工，新娘子家蔚於下午出席活動，唔夠瞓的她依然容光煥發，問到天明在哪裏？她笑說：「佢啱啱起身咋！（好醉？）有張櫈係準備畀我，但佢醉到要坐，要兄弟扶上房。（習慣做洪太？）未慣咁叫！之前已經互叫老公老婆，依家責任大咗，要一世照顧佢。（婚後酬勞加咗？）有加到！（婚宴使咗幾錢？）未計，都過百萬。」提到盡得兩位奶奶愛錫，她冧笑自誇「抵錫」！
傍晚時分，家蔚回酒店與天明將雜物搬上車，天明說：「我High到自隊呀！（洞房？）唔急！」家蔚透露婚宴有玩食蕉及咬提子等三級Game，但因有長輩在場而收斂。而晚上天明錄影《五覺大戰》時提到洪金寶表示已送樓給他，他指並非全數：「我住緊層樓都係佢送，要問清楚佢講邊度。」他表示將返內地掘金，希望家蔚放下工作相伴，亦會預留金額給她搞生意。
家蔚到酒店會合啱啱瞓醒的天明，齊齊收拾雜物離開。
天明與家蔚在派對又玩又喊，場面感人！
家蔚性感上陣開工繼續吸金！