親情無價 潮媽Mia擺脫心魔

年僅23歲的o靚模界潮媽陳靜儀（Mia），因行性感惹來閒言閒語，而備受壓力，幸得家人的支持才走出低谷，可見親情無價。

陳靜儀入行兩年多，要數她的Icon，除深長事業線外，要算是已為一子一女之母。Mia入行後難免被人揭瘡疤，壓力即從四方八面湧至，經過兩年多的歷練，Mia已解開心鎖，她說︰「依家好多人話我，好似叫我唔好獻世，但我唔會覺得係一回事，家人永遠是我的後盾。」Mia坦言「家」很溫暖，無論發生任何事，家人都無條件力撐：「嗰時我有咗BB，擔心畀屋企人鬧，但反而佢哋好支持我，媽咪發現我有BB後會氹我同關心我，同我講唔緊要，想生就生，如果冇能力養就會幫我養幫我湊。」親情洋溢，教人生出幾分嫉妒，但原來她曾討厭這個家︰「爸爸媽媽成日嗌交，所以我唔鍾意喺屋企嘅感覺，嗰時都幾反叛，覺得好難同屋企人談話，到之後有咗BB，中學同學因為咁疏遠我，覺得唔係我哋呢個年紀做嘅嘢，到嗰時先知道屋企人嘅重要。」

Mia兩年多前加入新八模，希望在娛樂圈闖一番事業，不過已為人母及行性感，除備受外界壓力外，親戚的閒言閒語亦時有所聞，但一如以往，家人照樣雪中送炭，為她排難分憂：「入呢行一路以嚟屋企人都好支持我，反而係有時啲親戚會講，做乜要拋頭露面，又露肉着咁少，但屋企人會叫我畀心機去做，最緊要係自己鍾意，舒服就好，我真係好感動！」

感情

Mia討厭孤獨，渴望被愛︰「每個女仔都鍾意拍拖，我只係鍾意可以氹我開心嘅人喺身邊，同埋錫我屋企人。做嘢壓力大，所以想有人喺身邊支持同傾訴。」然而，已為人母的她，想識異性並非易事︰「之前都有因為咁阻礙識男友，因為呢個社會未接受到呢樣嘢！所以我會專注工作先，而且我有小朋友係事實，唔會逃避！」

不過世事無絕對，儘管Mia在情路上屢遇挫折，但相信愛情的她現已尋獲另一伴︰「依家我有男友，佢好支持我做呢行，好明白我嘅諗法，而且佢接受我嘅家庭背景。」

工作

雖有家人的支持，但o靚模唔易做，拋胸露線是家常便飯，行性感亦需要勇氣。Mia說︰「着得性感開頭其實有啲唔慣，好關注人點諗，加上新聞嘅影響力大，但依家我會覺得呢樣係我工作，所以已經唔太Care性唔性感。」

問到性感底線？Mia說︰「如果正面或者題材好，會考慮性感冇底線，因為性感多人識，覺得呢樣嘢幫到我！」但性感只是剎那風光，圈中轉型的性感女星多不勝數，Mia深明此理︰「如果遲啲有咁嘅機會我都想，但暫時未必會喇！因為太長遠。」有點無奈但實際。

後記：重新站起

訪問當日Mia心情愉快，經常與小記閒聊，看來她已從去年失去至親的哀傷中站起來︰「爸爸病嗰時好傷心，開頭收埋自己同喊，但爸爸好積極面對，即使佢好辛苦，都會忍住安慰我哋，既然佢咁積極，我都要積極去面對！」見她變得堅強，亦不禁替她高興！