天明家蔚被玩殘 冇力造人

人緣極佳的洪天明與周家蔚昨晚舉行結婚派對，獲八百名好友到賀，場面墟冚兼星光熠熠！揚言努力造人的家蔚連日來與天明為婚事奔波，竟連新婚最重要的環節「洞房」亦無力應付，不過天明笑指會擇日重賽！

洪天明與周家蔚大前晚已舉行婚宴，昨日再假W酒店舉行結婚派對，獲八百名好友到賀，大部分是玩得的圈中人，而二人的兄弟姊妹團亦陣容鼎盛，除了有由鍾麗淇、姚樂怡及李思欣等28人組成的龐大姊妹團外，由錢嘉樂、謝天華、方力申、林文龍及唐文龍等組成的兄弟團亦輸陣不輸勢，連新郎哥天明亦笑說：「都唔明點解咁多姊妹！」他指好友謝霆鋒因工作關係未能赴會。

趕四月前炮製龍種

由於一對新人酷愛豹紋，昨晚派對以豹紋為主題，與諸葛紫岐的麵包超人婚宴相映成趣。問到派對主題是否豹紋時？天明竟搞爛Gag：「係『玩我哋兩個』！（洞咗房？）之前婚宴完咗攰到瞓着，呢樣嘢幾時都OK，不過今晚應該唔得，我哋聽日要做嘢。」而恨生B的家蔚亦冇所謂：「婚禮之後天明攰到暈咗，我四十幾個鐘冇離開過酒店房瞓覺，聽講生龍B要喺四月前，今晚應該唔得。」

在婚宴大讚天明很好的家蔚受問時感動落淚：「好開心好多外地朋友嚟香港見證我結婚，我喺呢個圈六年，好多交心姊妹！」一對新人又不忘玩骨痹，天明說：「今後我會努力做好自己。」家蔚冧爆說：「我會好好照顧你！」

嘉樂短期內娶盈盈

姊妹湯盈盈為搞氣氛扮路過摑天明，卻遭天明戲言：「我叫錢嘉樂唔娶你！」而被天明點名接棒結婚的嘉樂坦言有心理準備做「老襯」：「都要o架嘞！短期內啦！仲未求婚！」他又指不會在婚宴求婚搶鏡，並直認與盈盈一起後不再像從前般吊兒郎當。派對以自助餐形式進行，賓客流水式到賀，現場人山人海，一對新人全晚忙於做人肉布景板拍照及在台上任玩，姊妹團則在台上獻唱，但當播出天明求婚片段時，現場即時起哄。