霆鋒床戲被Cut 呻「白做」

謝霆鋒與內地女星楊冪被爆於新片有「親密接觸」，前者腼腆表示只是點到即止，且自爆屬「床戲新丁」，入行以來一直拳頭掛帥、枕頭欠奉，得悉親熱戲或被剪，即搞笑詐型呻「白做」了！

霆鋒與楊冪於英皇新片《消失的子彈》演對手戲，昨日二人分別現身灣仔會展舉行的影視娛樂博覽，卻擦身而過！霆鋒偕劉青雲、廖啟智等宣傳《消》片，期間監製爾冬陞突然爆霆鋒與楊冪的床戲要作出刪剪，身旁的霆鋒即打趣以普通話回應：「那我是白幹的嗎？」

囝囝多「保鏢」防拐

事後追問床戲的大膽程度，霆鋒急忙澄清：「其實唔係床戲嘅，只不過錫咗幾吓，我好少拍呢啲戲，對上一次印象中係同舒淇，拍呢啲戲感覺幾新鮮。（保形象唔想拍？）唔係，只係冇人搵，如果要拍，都要練吓！（練？）練大隻呀！」至於在「隔籬」宣傳《畫皮II》的楊冪，解釋因此片先提出邀請，故才缺席撞時段舉行的《消》片記者會，但表示稍後會現身內地宣傳補數。當被追問有否察覺《畫》片拍檔周迅及趙薇不和，導演烏爾善即代擋駕說：「流言，不好信。」

另外，對於近日拐子佬傳聞，身為兩子之父的霆鋒氣定神閒形容記者就如兒子「保鏢」：「記者追訪（囝囝）好好，我要多謝大家。每日有幾百萬對眼睇住，影張相就有二百個微博轉發，好有安全感。謝霆鋒傻㗎！我咁搏都係為咗兩個細嘅，如果嚟搞我，會咬住佢九世唔放！」他又指兩名兒子Lucas及Quintus年紀尚小，歡迎傳媒貼身追訪，甚至影他們換衫及大小二便亦無所謂，語畢令人忍俊不禁。

同場的青雲大讚霆鋒專業，不少動作戲堅持親身上陣。談到一場室內爆破戲，青雲亦坦言遭嚇怕：「好大聲，有發泡膠喺我面前飛過，感覺好似喺室內爆維港煙花咁！」將與古天樂合演彭氏兄弟新片飾演消防員的他，表示要努力健身。