傅穎聞謙失魂嚇窒甩咪

兩代「謙女郎」傅穎(Theresa)及楊怡昨日分別在會展出席活動,但Theresa揚言拒踩場會楊怡,更自爆多仔溝向舊愛示威,可惜卻跌咪收場,瘀爆!

羅仲謙(謙仔)的新歡舊愛楊怡及Theresa昨日分別現身會展亮相《香港國際影視展》的不同活動。Theresa與陳小春、趙碩之等出席娛樂公司記者會,當得知謙仔與楊怡傳緋聞,Theresa最初大方送讚美:「襯!都係靚仔靚女!」她強調與謙仔久未聯絡,難怪聞「謙」色變,竟然緊張到跌咪高峰,但她仍死撐只因個「咪」勾到衫!

自稱多人追

對於新任「謙女郎」楊怡在附近攤位宣傳,問到會否踩場?Theresa說:「唔會諗住去見佢,都唔識!雖然以前睇過佢啲劇,不過最近嗰套就唔得閒睇!」曾與謙仔公開不歡而散的她,問到對楊怡有何忠告?她說:「人哋嘅嘢順其自然,冇忠告!總之人要向前看,過去式就無謂提!」雖然她聲稱不急於拍拖,但又自爆最近吸引大批「男顏知己」埋身,實行向「食楊」的謙仔示威,活得比你好!另一方面,Theresa更否認是介入小春婚姻的「小三」:「女仔嘅名節好緊要,畀人屈都幾無辜!」

小春密密造

小春否認有「小三」,心中只得「大婆」:「我同嗰個人見過一次面,交換咗微信後就不停收到短訊,太太警告後已冇行動!」並指本欲轉電話避滋擾,但費時失事,惟有盡量減少與他人的眼神接觸。問到造人進度?他笑說:「好努力,腳都軟埋喇!」

另外,楊怡主演的劇集收視十分理想,昨日宣傳新劇時,心情自然靚爆!

影視組

傅穎難得返港出席公開活動,竟險些遇「情敵」,好濕滯喎!

謙仔

齋聽「謙仔」,傅穎已緊張到跌咪,見到真身會跌乜呢?

楊怡主演的劇集收視高收,難怪她由心笑出來!

無綫於影視展「晒半冷」,找來鄧萃雯、鄭嘉穎及林峯等多位小生花旦撐場。

陳小春心中只有「大婆」,身旁的趙碩之大可彈開些。