表舅父被攻擊 張敬軒：好心噏！
張繼聰在圈中的知心友不多，張敬軒是其中一個，對於表舅父張繼聰成為攻擊目標，軒仔說：「阿聰一向畀我感覺係一個好有智慧嘅人，佢好畀心機做嘢，音樂創作上都畀好多有用意見我。佢唔單止係好朋友，仲係一個好老公，外界經常用Kay同佢做比較，對佢好唔公平，始終事業發展要講際遇，好唔好亦屬見仁見智。而且攻擊佢嘅新聞內容好離譜，莫講話我係佢親戚或者朋友，即使作為同行，見到佢咁畀人攻擊，我覺得好心噏。」
他續說：「每次阿聰同我見面時，佢都好開心，成日講笑，唔覺得有病，知道後好驚訝！但細心諗，我自己都曾經係抑鬱症患者，好明白佢點解有病都唔想畀人知，雖然佢冇表露，但私底下承受好大壓力，同時要面對太太、屋企人同朋友，而且整個香港，無論環境同社會氣氛，都係一個培養抑鬱嘅地方，所以難怪阿聰得到抑鬱症。」
張敬軒（左）大讚張繼聰是好老公、工作認真及有智慧。（資料圖片）