蔡穎恩覓才子

與Anjaylia情同姊妹的23歲o靚模蔡穎恩（Evelyn），出道逾3年來是非少之又少，但感情生活卻令人關注。曾與Mr.成員Tom拍拖的她，有說經歷感情失敗，亦有說已有新歡，但真相始終是個謎！她不願多談往事，只強調現時仍是單身︰「身邊真係冇人追，可能一開始畀到大家嘅感覺好強烈，令佢哋卻步，但我好希望遇到好男仔，亦相信自己會遇到。」

夢想做煮婦

雖然恨拍拖，但即使眼前突然出現6呎型男，Evelyn亦不會刻意發展新戀情，她說︰「隨緣啦！我事業心重，依家工作又忙，所以都係放埋一邊先，唔會刻意去諗。」話雖如此，結婚、生仔仍是她人生中的大目標︰「我嘅終身夢想係做家庭煮婦，做個好媽媽、好太太，見到圈中好多媽咪好成功，好似謝安琪咁，所以我都想擁有一個幸福家庭。」

由Evelyn的緋聞可見，她擇偶不重外表，才華洋溢才是首選︰「我唔係重物質嘅人，比較欣賞才華型男仔，會睇佢做嘅嘢同表現，會畀佢哋嘅才華吸引。」不過礙於女子的矜持，她坦言即使遇上心儀對象亦不會主動出擊︰「我會去留意人，但唔會做主動，但唔介意男仔因為鍾意我而去騷才華，依家身邊都有才華型男仔出現，但呢啲慢慢嚟。」

為港男平反

問到該「才子」是何方神聖，Evelyn避而不答，希望低調處理感情事︰「我嘅工作已經高調，所以想呢方面低調啲，要有自己空間，我會用最大能力去保護。如果拍拖，我唔會刻意去講，唔希望對方尷尬，想人明白其實我都係一個普通人。」雖然她堅持「拉鏈嘴」，但卻力撐港男亦有絕種好男人︰「香港男仔易溝通，其實都幾好，可能好多人覺得港男唔好，但唔係所有都唔好囉。」

後記：鬥快做媽咪？

Anjaylia年紀輕輕兼未拍過拖，但卻恨生小朋友恨到出面，更自爆體內的母性基因不斷湧現，滿腦子都是生兒育女念頭︰「見到朋友都生仔，自己都想生，最好一仔一女！」她與好姊妹Evelyn同樣喜愛小朋友，未知誰會搶先結婚生仔呢？

Evelyn再三強調以家庭「煮」婦為終身目標，但原來小時候有另一個夢想︰「細個想做幼稚園老師，因為我有個妹妹要成日照顧，所以想照顧小朋友，但之後發覺做呢行唔簡單，所以放棄。」可見她母愛氾濫，小記惟有祝福她早日覓得良伴。