陳嘉寶守初戀

香港地靚女普遍已成港男獵物，要找個單身的談何容易？世事無絕對，總有幾個走漏眼，20出頭的蔡穎恩（Evelyn）與陳嘉寶（Anjaylia）樣子甜美，理應冧死仔，但前者未有追求者，後者更從未拍拖，仍在苦等心目中的Mr. Right！

娛樂圈最熱烈討論的除了是非就是感情，「邦民女」陳嘉寶（Anjaylia）甫出道已憑清純形象迷死宅男，正當大家以為靚女定必已被「私有化」，但現實卻剛剛相反，22歲的她竟從沒有戀愛經驗，出道3年來差不多零緋聞！不過，未知是否青春大晒，她對感情事從不着急︰「上帝早已準備，可能依家Timing唔啱啦！我唔會諗幾時有拖拍，呢啲嘢我信緣分。」

高大有着數

Anjaylia承認裙下之臣眾多，但她的心恍如石造，即使有男士屢敗屢戰，亦未能擊破她的防線，她笑說︰「一路以嚟都有人追，專業人士、後生靚仔都有，但真係未必啱。好似之前我同一個男仔玩得好埋，好似兄弟咁，但原來佢鍾意咗我兩年，但我覺得冇Feel。我鍾意嘅人條件未必要好好，更加無分國界，但我統計過，我鍾意過嘅人多數都係高同膚色白嘅。」

不少年輕人早於求學時期已情竇初開，但Anjaylia思想卻非常傳統，反對「求學時期談戀愛」，她說︰「中學時覺得自己好細個，應該讀書，冇諗拍拖，但若有男仔拎嘢畀我，都會有少少心動。」不過心動又如何？她不會主動出擊︰「我未試過示愛，唔會直接講，但我會做一啲嘢去感動個男仔，如果佢感受唔到，可能佢蠢啦！但應該係佢對我冇意思，因為我唔會鍾意蠢嘅男仔！」

急避劈腿男

回想起男仔的冧招，她不禁甜笑︰「有個人只係見過一次，但竟然送咗一大箱紅酒同7份禮物去我公司，再打嚟問我可唔可以做朋友。」有人大灑金錢，亦有人投其所好或從朋友身上入手，問到有否被嚇怕，Anjaylia耍手擰頭，反而自爆曾有男仔想一腳踏兩船︰「曾經有男仔以單身姿態追我，但原來有女朋友，我當然走夾唔抖，我唔會因為要拍拖而破壞道德原則！」