Lady襲港 潮拜掀Ga風

女歌手Lady GaGa將於五月首度來港開騷，掀起大批Ga迷通宵排隊撲飛！何以這麼多人包括圈中人向這位百變天后如此潮拜？不如今次率先將其傳奇事迹溫故知新，拆解鮮為人知的一面。

祖兒有一裙之緣

貴為天后的容祖兒早前為好友黃偉文的作品展擔任表演嘉賓，件件歌衫靚到爆，其中一件螺旋設計的紅色連身裙，原來是GaGa曾穿着出席MTV歐洲音樂獎，難怪她笑言與GaGa有一裙之緣：「我不嬲都好鍾意紅色，Wyman幫我『班』到呢條裙，我真係好鍾意！仲要係GaGa着過，同佢有一裙之間嘅緣，感覺好得意。我哋分別着呢條裙演繹唔同風格，佢唱快歌我就唱慢歌，味道好唔同！呢條裙順利由GaGa來到我手上，仲要Fit到個身形同環境，所以印象好深刻。」

問到會否捧GaGa的五月港騷，祖兒坦言原本很想去，但屆時自己也有演出，所以未能欣賞：「希望遲啲可以喺其他地區睇，因為知佢係一個好年輕嘅歌手，好想親身睇佢舞台上嘅演出，吸取唔同經驗。」

王祖藍鑽研模仿

何解GaGa如此受歡迎？除了歌正舞勁外，另一重點是其造型次次夠「癲」。向來以搞笑出位的王祖藍，不止一次模仿她，他表示有此構思完全多得曾志偉提點，問到是否忠實Fans，他說：「一般啦！無可否認佢係潮流指標，我為咗扮佢花咗唔少工夫！」祖藍透露為扮其舞步，第一時間邀請排舞師學跳舞：「根據我嘅觀察，GaGa跳舞動作唔多，反而上身郁得夠狂放，所以不停好誇張咁郁身郁勢已經似足七、八成。」他又謂扮GaGa有三大要訣：「第一係夠癲喪，第二要搵衫精準，第三係化妝一定要有好重眼線同眼影，同埋好勁嘅唇膏，加埋招牌動作就會好似喇！」

鄭融嘆同場不見

鄭融於09年的GaGa澳門個唱中，有幸擔任表演嘉賓，提到GaGa的港騷撲飛熱潮，自言當日在後台未有機會與百變天后有一面之緣：「大家休息室唔同，喺後台冇機會見！我表演完就出咗去睇佢唱歌，慶功宴同After Party佢都冇出現，但做到嘉賓已經好開心！」雖有傳GaGa怪癖多多，但鄭融力撐她是全能藝人：「舞台效果好有創意，無論MV定首歌嘅Message都好正面﹗」她還讚GaGa的戰衣由時裝猛人設計，令各界合作擦出新火花，可惜今次港騷撲飛不成：「原本老闆想請我哋睇，但都買唔到，惟有諗吓其他方法！」

楊汀叮望被揀中

自認GaGa迷的楊汀叮不僅儲齊GaGa的黑膠碟，今次更有機會親睹真人表演！汀叮指在GaGa的外國演唱會中，舞台有多條通道，GaGa經過不同通道直達觀眾群中，只要被點中即可到後台與她真人對話！雖然香港騷未必有特別措施，但汀叮揚言要以突出造型殺出重圍，希望有幸被GaGa教主欽點：「我諗緊化咩妝扮佢，最起碼都要化個經典藍色閃電Look！其實佢試過喺面側邊加角扮外星人，但化到咁睇騷好唔方便。」她透露現時約有兩、三個造型想試，問到今次個唱最期待的部分，她二話不說：「一定想睇佢嘅造型、舞台效果！」

Profile

GaGa原名是Stefani Joanne Angelina Germanotta，曾以優才生資格提早入讀紐約大學，但因覺得學校不適合而退學，並在酒吧以性感衣着跳舞唱歌。GaGa曾簽約Def Jam唱片公司，以真名推出首張專輯，但三個月後解約。08年正式出道的她迅即掀起熱潮，兩張專輯的全球銷量分別達1,500萬張，在《格林美》等多個頒獎禮連掃多個獎項。