祖兒JM掛住「濕平」 互當冇到

當樂壇天后容祖兒與「模Art」文詠珊同場相遇會怎樣？二人日前掃貨時相遇，由背對背、到擦身而過，依然互當透明，全程零交流！

祖兒與文詠珊（JM）兩個大忙人，日前不約而同於中環一百貨公司「濕平」（Shopping）。當日下午5時許，兩位靚人同時現身店內，自然相當搶眼，甚至連不少街外途人亦透過櫥窗眼望望，唯獨兩位當事人卻視而不見！

僅隔一個身位

戴上黑超、兼有媽咪相伴的祖兒，最初與JM各據一角揀心頭好，祖兒極速揀中一對5吋高的靚鞋，換上新鞋後即時高人一等，向來孝順的她更順道為媽咪揀選飾物。至於同樣專攻高踭鞋的JM，一度在祖兒母女身邊擦身而過，雖然相隔不到一個身位，但大家仍然是視若無睹！

後來，JM轉身到另一邊的層架，與祖兒更形成背對背局面，大家距離極近！不過，未知是否新鞋太吸引，她們依然未有留意對方的存在，相當有趣！JM更投入地一度懶理「模Art」身份，踎在地上揀鞋！雖然同場了近1小時，但二人始終是零交流，全程冇打招呼！