許亦妮母遇扑頭黨 浴血街頭冇人理
應屆港姐季軍許亦妮前晚出席活動時,自爆母親剛在內地慘遇扑頭黨,光天化日下被強搶財物及襲擊至頭破血流,最離譜是周遭途人竟視若無睹,令人髮指!
許亦妮前晚出席保良局慈善晚宴,她甫見記者即忍不住自爆母親的不幸遭遇:「媽咪喺東莞做美容生意,15號嗰日,佢一個人上去搵個朋友。其實佢一上架的士已經懷疑係賊車,因為個司機講好多佢唔識聽嘅方言,跟住佢落車就畀人扑,個賊人唔係好高,啱啱扑正佢後腦,期間佢同個賊人有糾纏,搞到成身瘀晒,塊面又腫晒,幾乎暈倒!佢係用盡所有意志去到人多嘅地方先暈,但內地人好冷漠,佢嗌咗兩次救命,仆低埋都冇人救佢,後尾佢個朋友嚟到先發現我媽咪瞓咗喺度,送佢去醫院,去到醫院止咗血,尋(前)日返咗香港,但依家個頭仲痛緊,最擔心係有後遺症同個腦積瘀血。」
怒斥冷血無情
許亦妮又指母親當時身上有一萬元現金、一部新購買的iPhone及所有證件同時被搶去,她氣憤難平,斥責賊人及途人冷血無情:「我覺得內地人視生命好似爛命咁,求財不特止,仲要攞晒人哋啲證件,媽咪返嚟要辦過晒啲手續好麻煩!我一路喺外國大,但都睇到內地好多搶劫新聞,知道內地嘅人好冷漠,我知道呢個消息時做緊嘢,行唔開,但個心嚇到跳咗出嚟!」她表示事件發生後,家人輪流陪伴母親,祝願許母早日康復!
許亦妮怒斥匪徒冷血無情,令其母險客死東莞!
許亦妮(左起)擔心媽咪的情況,梁麗翹及張曦雯亦加以安慰。