阿徐嚴防拐子佬請保鏢護女

最近盛傳有拐子佬在街頭向小朋友埋手，令不少家長憂心忡忡，其中徐濠縈有意為女兒康堤聘請保鏢貼身護駕，而張智霖則大罵拐子佬可恥，郭晉安更鬧爆應拉拐子佬去斬！

繼有商場出現疑似拐子Partner後，近日更有名牌小學出現拐子黨，令一眾星級父母擔心到爆，想盡辦法保護子女！向來錫女兒康堤「包包」錫到燶的徐濠縈，昨日受訪時直言很驚慌：「尋晚同Eason（陳奕迅）傾過都好擔心，陳家上下老人家又通過電話，佢哋都好擔心孫女嘅安全。我哋唔可以成日接包包返學，會由工人同司機一齊接，好在包包好醒目，學校又安全。我唔會畀佢單獨出去，多數係媽咪或者我帶，亦唔畀工人帶個女去食嘢。」

不再公開近照

為免包包被「點相」，阿徐不再在網上公開她的近照，並叮囑她小心陌生人，若有陌生人請食糖也不要接受。問到會否請保鏢，阿徐說：「之前諗過，後來覺得冇必要，依家會再同Eason商量吓！」而Eason亦很贊同老婆的提議，並笑說：「我冇搵咁多錢，所以拐子佬目標應該未到我。」

至於育有一子一女的郭晉安，近日亦加緊(目及)實囝囝，但由於他向來管接管送，所以不太擔心：「我想知拐子佬動機係咩，先至可以對症下藥，我覺得呢啲人應該拉去斬！」而張智霖（Chilam）則要親人接囝囝張慕童放學才安心：「要加強防犯，提高警覺！呢啲行為真係無恥，100%唔應該咁做！」

栢芝多人湊仔

同樣着緊兒子Lucas及Quintus的還有張栢芝，其經理人余先生說：「平時都有5、6個人幫手湊，栢芝喺香港仲會親自接送返學放學同出街，唔喺香港就叫親人睇住，好似家姐同媽咪咁。」而「宇宙最強」甄子丹的太太汪詩詩則表示，囝囝一直有學習跆拳道，並打算與工人開會，提醒他們加緊注意安全問題：「我一向親自送小朋友返學放學，出入都有司機同工人，好安全，我仲教小朋友唔好同陌生人接觸。」

范姜：學校嚴防

真係好驚！出街都捉實個女，唔會畀佢離開視線範圍。學校都加強措施，接返學放學都要出示家長證，離開學校時，更會核對你接走嘅學生係咪同證件上嘅相符。每次接鍾懿放學都係屋企人，就算有事遲咗去都會通知學校，絕對唔會畀唔識嘅人接走佢。

胡諾言：拖實手仔

我覺得拐子佬好陰濕，呢啲人等天收！我同老婆親自接送囡囡返學放學，佢細細個開始，我已經教佢一落車或者喺街要拖實，唔可以周圍走。我覺得學校唔使加強保安，因為已經冇得再好，有時送佢返學，見到老師同職員成隊兵咁企喺門口。

洪欣：管接管送

每次囝囝返學放學同參加課外活動，我都管接管送，只會畀佢自己落樓買吓雪糕咁。不過佢已經11歲，好多同學仔都自己返學放學，所以曾經叫我唔好接送，但我同佢解釋，話媽咪會好擔心，之後佢冇再要求喇！

曹永廉：長氣訓話

老婆同囝囝學校嘅同學同家長，相約去內地主題公園玩，但我要開工去唔到。出發前，我變咗長氣爸爸，不停同個仔訓話，又同佢一齊睇新聞報道解釋清楚。其實我好懷疑嗰啲人嘅動機，未必係拐帶，可能另有企圖。

莫可欣：少去商場

有時防不勝防，惟有盡量小心啲，人多嘅地方我會(目及)實啲，教囡囡千祈唔好同陌生人講話。依家有啲商場人流多，品流比較複雜，盡量唔好同小朋友去咁多。如果唔見咗囡囡，我諗我會終身內疚！

謝安琪：人盯人

平時都有教囝囝保護自己，帶佢出街會採取「人盯人」政策，唔會畀佢離開視線範圍，同埋叫佢喺陌生地方跟住大人行。學校保安一向嚴謹，所以好放心，反而希望警方徹查拐子佬集團係咪傳聞，等我哋安心。