糖妹呻Dominic冇On Call

組合糖兄妹成員糖妹（黃山怡）前晚出席頒獎禮時表示，未與剛外遊返港的男友Dominic見面，因對方電話壞了，未能即時聯絡得上。

糖兄妹、狄易達、洪卓立和HotCha等前晚出席《傑出義工獎勵計劃》頒獎禮。早前被本報拍得與跳舞組合Bro5成員Dominic十指緊扣的糖妹，為免影響事業，揚言不想提男友，但在多番追問下，她仍難掩甜蜜心情。

個唱主動示愛得米

對於男友剛由外地返港，問到有否收到手信，糖妹說：「佢返嚟都未見過，但有搵佢。（一返香港就Call你？）佢嗰邊電話壞咗，所以都唔可以即時Contact到，不如講番工作啦！少啲提佢，怕影響做嘢！」

對於曾否認暗戀Dominic而被指是大話妹，問到會否介意此稱呼？糖妹說：「我哋之前都冇拍拖，冇所謂啦！事實證明一切。（你之前喺演唱會講我愛你？）我咪就係嗰次得米囉！（你做主動？）我哋係自然喺埋一齊，冇理由我暗戀咗咁耐佢唔知。」

問到日後會否與男友Dominic一同工作？糖妹說：「大家唔同公司，睇公司安排。（公開戀情怕破壞女神形象？）我不嬲都覺得我唔屬於宅男女神，我只係糖妹。」