Stephy狂碌小方卡 憂男友起釘

早前偕男友方力申（小方）歐遊的鄧麗欣（Stephy），首次到巴黎便遇到賊仔，令心情大受影響，幸可用小方的信用卡瘋狂購物洩憤！他倆昨日返港時心情勁靚，更大方合照！

前晚小方與女友Stephy由英國返港，二人推着行李步出閘口，大方接受本報訪問。歐洲浪漫之旅令他倆樂而忘返，惟美中不足的是Stephy在巴黎凱旋門被扒手偷去銀包，她說：「我完全唔察覺有人走近過，偷咗都唔知。」小方亦自責未有好好保護女友，他「自首」笑說：「你梗會問我點解冇好好照顧佢，因為我當時掛住影相囉！」

不愛巴黎愛英國

由於銀包被偷，身無長物的Stephy只好向男友求救，她笑說：「我梗係要化悲憤為力量，瘋狂購物！我買咗好多嘢，衫褲鞋襪乜都有，但因為我冇錢冇卡，咪借小方張信用卡碌囉！」不過她笑言一定會還債：「我怕佢起釘，數還數，梗係要還啦！」首次遊巴黎的她連好心情都被賊仔偷去，故她不愛巴黎愛英國：「巴黎係好靚、充滿藝術氣息，但英國好大城巿、好乾淨。」

小方此行最開心的是能到足球場欣賞英超賽事，身為英超球隊阿仙奴擁躉的他更為球隊贏波而大感興奮！除了睇波，小方最愛到博物館及藝術館參觀，更拍下不少照片留念。