泳豪戀混血韓妹 做番個男人

楊思琦前日自爆誕下B女，本報亦率先踢爆被她狠撇的李泳豪，已與中韓混血索女蜜運中，正式放低九年情，告別思琦時代的女尊男卑，可以堂堂正正重申：「我係男人」。

現年33歲的李泳豪去年被拍拖9年的楊思琦狠撇，經過逾八個月情傷，近日已重新出發，與25歲中韓混血兒Miki蜜運。豪仔與女友在網上傳情，昨日Miki向豪仔詐嬌：「等着你呀！」她要求男友為她買Hello Kitty精品，豪仔答應一定會買。

玩飄移撻着

豪仔昨日在電話中坦承：「我係識咗個中韓混血女仔，係年初經朋友介紹。（第一個情人節點慶祝？）只係識咗幾個月，未去到咁深入，互相了解中。（見咗家長？）未，佢識睇中文報紙，我驚講錯嘢嚇親佢。（點撻着？）啱傾，緣分。（佢知你同楊思琦嘅事？）佢有睇報紙，亦知我承受好大壓力，佢好體諒我，但我重申，我係男人，唔想大家成日覺得我好慘咁！」他又稱Miki令他重新振作：「我真係比之前開心咗，係呢個女仔成日同我傾偈、溝通，幫咗我！（張秀文主動追你，你因港姐陰影拒絕？）唔覺得佢追我，亦唔關陰影事，緣分嘅嘢唔係就唔係。」

本報昨日將Miki起底，樣貌與陳嘉桓有幾分相似的她，屬手長腳長高挑類型，從事文職工作，間中會兼職Model，故與圈中人張致恒等稔熟。Miki除喜歡入廚及收集精品外，對飄移亦感興趣，故與豪仔有共同話題，亦是飄移撮合她與豪仔，更重要的是，擁有中韓血統的Miki，思想亦保留大韓民國以男人為尊的民風，令與思琦過了九年女尊男卑拍拖生活的豪仔，重拾自我。

施明恨見「新抱」

對於兒子新戀情，母親施明說：「中韓混血兒？咪好靚女！想見吓，新抱茶嘅嘢慢慢嚟，新戀情係治情傷嘅良藥。」豪仔父親李家鼎則說：「佢（豪仔）冇同我講新戀情。（想飲新抱茶？）之前夠想啦！咪又冇！」豪仔哥哥李泳漢說：「唔怪得之前我食雪櫃盒泡菜，豪仔詐我型！（傳港姐張秀文追豪仔？）港姐？見過鬼仲唔怕黑咩！」而豪仔昨日與李家鼎吃飯，下午四時開車接施明外出，之後才自己逛街，未與Miki見面。

新歡起底

姓　　名：Miki（傻妹妹）

年　　齡：25歲

出生地：韓國

居住地：香港

職　　業：兼職模特兒

家庭背景：做生意