Jeana「愛」犧牲：我就係咁犯賤！

事業一百分，感情零雞蛋，很切合何佩瑜（Jeana）刻下的狀況，究竟翻撻舊愛好，還是緋聞男友La Ying比較窩心？Jeana一句：「我只得22歲，仲有大把時間，使乜急？」絕對皇帝女唔憂嫁！

我依家感情生活陷入一個迷惘期，又好似跌入大海一樣，完全冇晒安全感！其實我係一個好難去愛嘅人，如果我真係愛一個人，無論點都好難抽身，無論對方啱定錯，我都願意為佢犧牲，何佩瑜就係咁犯賤！

所以我一直對所有追求者保持冷漠同婉轉，唔想令人有無謂嘅遐想！我向來篤信命理，相士話我生命線同事業線黐埋，所以我天生就係一個視愛情如命嘅人，仲要係好澎湃嗰隻。為愛情，我可以乜都唔理，亦可以為愛犧牲，但喺大前提下，我係唔會放棄理想，希望鍾意我嘅人，都會包容我嘅理想！

「錯嘅時間遇上啱嘅人」

好老實講，如果你話我同以前個男朋友毫無瓜葛，就真係呃你！但彼此之間實在有太多問題仲未解決，佢明知我深愛做呢一行，但佢只係想要一個平凡人做佢女朋友或者老婆。為咗呢件事我哋嗌過好多次交，唔知點收科，我依家就係畀呢幅牆隔住咗，真係好想快啲跳出去冷靜一下！但我真係好唔捨得佢，我對佢不但有愛情，仲有無限嘅感情，點解佢唔喺我嘅立場去諗多少少呢？原來我喺錯嘅時間遇上啱嘅人，除咗可惜之外，我仲可以講乜，為咗佢我唔知喊過幾多次，迷失過唔知幾多次。

好彩，真係有好多人錫我！上次我胃炎，痛到輾轉反側，我知道La Ying當時一直喺我嘅身邊，佢同其他人唔同，對我好真，唔會計較一切，亦唔會乘機佔我便宜，係一個呢個世界就快絕種嘅男人。不過，大家依家仲係做住好朋友先，我只得22歲，仲有大把時間，使乜急？

（明日待續）