老公揸新玩具接送 袁詠儀上車露苦相

張智霖太太袁詠儀(靚靚)日前帶愛兒「魔童」與女友人於中環行街,孭小背囊的魔童紮紮跳,但發現記者時,靚靚即一手抱起囝囝。問到帶兒子去哪裏玩,靚靚說:「我哋去買啲嘢啫!」三人離開商場,張智霖隨後駕駛落地僅四日的白色Fiat新車來迎接。由於車仔細細,靚靚上車時側晒身,一度面露辛苦表情。

另外,即將榮升馬主的張智霖獲馬會委任為「打吡大使」,昨日他出席活動時表示與好友商討為馬匹改名,問到是否包括郭富城?他笑說:「都有o架!大家一齊傾嘅時候會搞出好多笑話。(效法城城用歌名如《骨膠原》?)我都有諗過,但『骨膠原』比較蹺口,怕講出嚟好似粗口!」他又笑言曾拜阿叻陳百祥為師:「嗰陣時大家都好認真,斟晒茶咁!」提到城城與女友熊黛林時,張智霖即顯得避忌,但讚對方開腔護女友很Man!

袁詠儀掃完貨,抱起大大件的魔童與女友人離開。

袁詠儀上「新車仔」時側晒身,面露痛苦表情!

張智霖透露正為愛駒之名傷腦筋。