合約糾紛 梁小龍插星爺抽水海鮮價

周星馳與資深藝人梁小龍鬧翻!於電影《功夫》憑踢拖耍功夫兼一招「蛤蟆功」令人留下深刻印象的梁小龍,曾簽星爺旗下,最後卻不歡而散。梁小龍昨日受訪力數星爺抽佣「海鮮價」兼「丟失合約」;星爺旗下公司星輝則否認其事!

不少曾跟周星馳合作的藝人均鬧出不愉快,如兩位「星女郎」黃聖依及張雨綺,更就經理人合約鬧上法庭,黃聖依得緋聞男友楊子賠錢了結官司,但二人仍不時說起前經理人公司的不是,而已嫁人的張雨綺則仍跟星輝打官司。

04年憑電影《功夫》火雲邪神一角,令觀眾留下深刻印象的前輩演員梁小龍,與星爺同樣不歡而散!雖然事情已成過去,但他至今仍未釋懷,友儕間只要一提起星爺,他便即時「着燈」,力數跟對方之恩恩怨怨!

記者就此事致電梁小龍,他說:「08年係佢(星爺)親自打畀我叫我簽約,起初都有猶豫,但見佢咁有誠意,又話會幫我傾外國公司,最終都應承咗簽三年,點知佢哋公司抽佣抽到好似『海鮮價』咁,仲係抽好多,真係好過分!我同佢公司啲高層食飯,想睇番份合約,佢哋竟然同我講唔見咗!之前同周星馳講好,如果合作得唔開心就會提前解約,所以合作咗年幾,我就提出解約!」

問到如今如何看星爺?梁小龍沒好氣地說:「佢叻人嚟嘅,一個好叻投機嘅人!(會唔會好嬲佢?)唔會,我蠢先畀人食啫!當攞個經驗囉!」

星輝否認提前解約

對於梁小龍的兩宗指控,星輝發言人說:「抽佣係依足合約列明咁去抽,唔會有海鮮價,至於話唔見合約,更加冇可能,佢隨時都可以攞番合約複印本。(梁小龍提前解約?)冇啲咁嘅事,係夠期完約。」

當年有份斟梁小龍簽星輝的田啟文,指抽佣價錢依足合約,又指如梁小龍有需要,田啟文雖同樣已離開星輝,但樂意幫對方向星輝索回複印本合約。

影視組

雖然不少合作過的藝人有「微言」,但夥拍周星馳又真係「紅」得起喎!

梁小龍(左起)、元秋、周星馳與元華當年拍《功夫》,於片場有傾有講。

「星女郎」張雨綺與黃聖依先後與星爺「反面」。