Chilam豪買慳油「愛妻號」

愛車如命的張智霖（Chilam）再添「新玩具」，日前他到車行試車，其後即豪爽碌黑卡付款！他再破慳囊，原來是為響應環保慳油，但其後就要乾啃叉燒包。

繼早前花上數百萬豪買靚車後，Chilam日前下午再往銅鑼灣一間車行，原來他早已鎖定「目標」，對推出僅數月、價值20多萬的Fiat 500「玩具車」情有獨鍾。穿皮褸戴黑超的他甫出現，汽車經紀即笑面相迎，與對着宣傳單張左指右點的Chilam研究一番，他隨即試坐陳列車，更引來車行餐廳內茶客的目光，不少人更邀他合照，他亦沒托手。

未幾，車行職員便安排座駕於車行門外等候Chilam試車，但由於當時交通繁忙，驚動了警員到場了解，不過亦無損他的心情，心急地坐上車「大展身手」，然後即返回車行簽約，更掏出黑卡付款！但當他完成交易後，卻走到附近麵包店，買了一個數元的叉燒包「乾吞」醫肚。

同老婆Share揸

事後記者就買車一事致電Chilam，他笑說：「咁都畀你見到？（又買車？）因為嚟緊我喺香港接咗電影同電視劇，每日開工揸長途車，梗係諗計慳油啦！聽講呢架車好慳o架！我咁支持環保，一定身體力行，況且車行畀咗個筍折我。」他表示再添座駕，會與太太袁詠儀「分享」：「我揀咗白色，咁我唔用佢都可以揸嘛！」