on.cc 東方互動主頁

Jeana 胸懷大志：我討厭周秀娜！

周秀娜現象成為大學課題，她的成功令無數胸懷大志的女生趨之若鶩，史上最寸嘴o靚模何佩瑜（Jeana）也是其中之一！做人搶韁勁過娜姐，布也穿得少過她，為何永遠都被娜姐這道牆阻住？或許雌性動物天生妒忌心重，Jeana一句：「我討厭周秀娜！」正如常常輸給諸葛亮的周瑜慨嘆：「既生瑜，何生亮？」卻不明白共振定律。Jeana將一連5日剖白入行心聲及生活態度，讓讀者零距離了解她。

我份人好有表演欲，你話我自戀又好，話我乜都好，天生就喜歡別人圍住我團團轉。09年因亮相《美女廚房》而為人熟悉，一直好想出名，翌年周秀娜公司選新八模，呢個機會可一不可再，所以膽粗粗去試試，我知道自己一定選到。

結果大家都知啦！我成為新八模，咁就做咗周秀娜師妹。一直覺得娜姐好犀利，佢咁紅玩轉o靚模界，真係好想複製佢條路，做寫真女王。當然，我認為自己有咁嘅能力啦！新八模無疑係我嘅踏腳石，無奈呢塊踏腳石好細，新八模出一本寫真，一塊餅要八個分，咁都算，點知嗰年八個女仔最有新聞價值係生過仔嘅Mia（陳靜儀），注意力集中晒喺佢度，仲要每次宣傳都由娜姐帶頭。我明明高過娜姐同Mia，唔知點解次次影相都影唔到我，彷彿所有宣傳都唔關我事，一句講晒「冇癮」！新人嚟講，何佩瑜連二、三線都去唔到！

毛遂自薦出寫真

真係萬念俱灰囉！原來默默耕耘等上位只係得個吉，我做乜要再浪費時間呀！莫非要等「新新八模」呀？舊年公司又揀女仔出寫真，知道娜姐唔玩，我唔理，一定要出個人寫真，所以衝上公司表明心迹，我已準備好一切，會不惜一切豁出去搞好呢本寫真！機會終於畀我爭取番嚟，真係講不出咁興奮，我知道自己做梗寫真女王，講真，周秀娜做到，點解我做唔到？我一早刨晒佢啲寫真，娜姐着過邊件比堅尼我都記得，影得靚過佢有幾難？

長江後浪推前浪

真係好開心，寫真出嚟嘅效果喺預料之內，包括塑造咗一個敢言形象，開始有好多人包圍我，有好多嘢做，擁有好多演出機會。不過，我同娜姐距離仍然好遠，我活生生活喺一個殘酷現實之中，原來我仲喺起步階段，有時真係諗，如果冇咗佢喺度，機會會唔會落喺我身上？諗吓真係有啲唔忿氣，係有少少討厭周秀娜囉！哈哈！不過掉番轉頭諗，呢一刻只係剛起步，平心而論，娜姐嘅努力真係令人欽敬，我知道要比佢更努力先可以爬頭。我一出道已經講過長江後浪推前浪，深信我呢股後浪好強勁，何佩瑜唔會咁易認輸嘅！

（明日待續）