莊思敏等Mr. Right雪定卵子

娛樂圈中，勇於承認整容者寥寥可數，模特兒莊思敏是少數的一個！敢言、大膽一向是她的標誌！今次她論盡港男，更大爆為了打破生BB的年齡界限，現正考慮雪藏卵子！她更寸爆圈中整容女星，是名副其實的木偶鼻！

今年31歲的莊思敏（Jacquelin）去年揮慧劍斬情絲，結束與歌手吳浩康的5年情，令本來人生到達談婚論嫁階段的她，今年首度單身過情人節，難怪她坦言不習慣兼有壓力，她慨嘆：「都已經好耐未試過單身，身邊朋友仲擔心過我，之前未到情人節都已經問定我點過，一下子我都有壓力！（怕唔怕被標籤為剩女？）其實都已經畀人標籤咗啦！」

「港男自卑自大」

被標籤為剩女的Jacquelin，當然不甘示弱，乘機向港男作出大控訴：「初頭聽到人哋標籤我為剩女，當然唔係咁高興啦！依家諗深一層，我覺得港男會咁樣標籤港女，都係因為佢哋自大兼自卑！佢哋成日話啲女仔嫁唔出，不過佢哋追女仔時怕醜又多顧慮，唔敢開口Take Action！呢個世代啲少爺仔畀人寵壞晒！」對於港女被指市儈，她亦作出大平反：「如果男仔有能力，就唔應該介意女仔用啲咩名牌啦！」

生育篇

雖然把口勁兇悍，但講到底，Jacquelin心底仍渴望Mr. Right出現：「其實我係一個需要拍拖嘅人，我需要有人喺身邊分享同分擔！（理想對象？）人品好、專一、有上進心，因為我係一個幾冇安全感嘅人，我需要對方畀到好大安全感我！」雖然她渴望拍拖，但堅拒成為第三者：「我相信因果報應！若果我做咗人哋嘅第三者，我相信我將來都會畀人撬牆腳！」

「相信因果報應」

走在潮流尖端的Jacquelin，為了打破生育的年齡限制，現正考慮為自己雪藏卵子：「拍拖、結婚唔應該有時間限制，奈何女人係有生育嘅年齡限制，不過我又唔想因為40歲前要生仔，而迫於40歲前要結婚，所以我正考慮為自己雪藏卵子，都有問醫生意見同費用！（考慮人工受孕或搵代母？）都可以o架！」

整容篇

去年坦承曾接受隆胸，以及割雙眼皮整容手術的Jacquelin，問到會否再接受整容手術？她說：「我唔覺得自己仲有咩需要整囉！人要接受自己有唔完美嘅地方，個個都希望可以好似李嘉欣咁靚，不過唔係個個都適合！其實女仔嘅內在美都好重要！」

「整容識停手」

圈中不時有女藝人傳整容，雖然當事人否認傳聞，但卻被冠以「木偶鼻」稱號，Jacquelin寸爆說：「我覺得木偶鼻係同講大話有關，因為有人整咗容唔認，但又Keep住整容、Keep住講大話、個鼻咪Keep住高囉！」她又力勸大家千萬不要整容整上癮：「整容去到某個地步就要停手，唔好太過分！如果唔係就會好危險！」