謝安琪環球絕唱冇份大合照

謝安琪前晚最後一次出席由環球接洽的工作，以大露背裝演出悼念張國榮演唱會，雖然受訪時有環球高層傍實，但卻冇份影騷後大合照。

謝安琪（Kay）、陳奕迅（Eason）、李克勤、吳雨霏、劉美君、莫文蔚（Karen）、張敬軒、Mr.、林子祥及其兒子林德信等環球歌手，前晚演出《浮想聯翩張國榮》演唱會，獻唱哥哥張國榮（Leslie）的經典金曲以示悼念，而陳慧琳與林憶蓮分別因在家養胎及忙於綵排演唱會而預錄短片。

陳奕迅眼紅紅

演出期間，Eason與Karen感觸良多，腳傷未愈的Eason說：「今日唔使單腳企，得哥哥庇佑。」唱罷即雙眼通紅，並向天飛吻說：「We miss you Leslie。」而Karen則透露哥哥生前很關心其感情生活：「好掛住Uncle Leslie，佢生前會問我另一半對我好唔好，依家可以同Uncle Leslie講，放心，我好幸福同開心！」

至於日前承認正跟環球商討解約賠償的Kay，罕有以大露背裝演出，獻唱哥哥的國語金曲《我》後，她在環球高層陪同下受訪。對於環球唱片董事總經理黃劍濤（Duncan）表示此演出是她於環球最後一項工作，Kay說：「係咩？唔知，只知呢個係放完假第一個活動。我一路都有音樂工作，唔清楚係環球定經理人接，亦從來唔會過問，嚟緊仲有好多工作同錄音。」問到環球會否為她派新歌上台，她說：「唱片一直都係自己做，做到七七八八先搞宣傳嘢。」

Kay強調過時過節都會見Duncan，但承認演唱會後，雙方已沒有傾談工作事宜，而在完騷後的後台大合照中，她與Eason及林子祥都不見蹤影，環球發言人對此說：「大家唔好咁敏感，佢哋有工作在身，冇留到完騷。」