JW心急返港 犧牲畢業禮

黎明愛將JW因要兼顧英國學業，一直只能當「暑期工」，今年她終大學畢業，決定返港做「全職」歌手，卻遺憾未能參加畢業典禮戴四方帽！

唱功了得的JW，唱片銷量不俗，無奈因兼顧學業而未能全身投入樂壇，今年她終告別學生生涯，她興奮地說：「暑假就正式畢業喇！好期待返香港，其實我都幾矛盾，因為我好鍾意地理呢一科，亦好鍾意唱歌，有時會諗，讀咁多地理好似冇乜用，但明白知識同學問係成世，所以幾辛苦都要捱埋佢，完成學業，唔會半途而廢！」

父母支持

學有所成卻堅持入娛樂圈，問到父母有否反對，JW說：「媽咪絕對支持我唱歌，而爸爸支持我之餘都有提醒我，要我記住學過嘅嘢，將來有機會就要回饋社會。」她預計6月底便會正式返港做全職歌手，問到老闆黎明是否已為她安排好全盤計劃，她說：「我都唔知呀！總之一切交畀公司安排。」

去年，JW為黎明演唱會擔任嘉賓，性感勁歌熱舞，贏盡好評，她承認舞台經驗尚淺，感激老闆給她機會增添信心。而於暑假返港後，她便不用再返英國：「唯一可惜係參加唔到畢業禮，因為今年撞正倫敦奧運會，畢業禮押後到10月先舉行，所以我等唔到畢業禮就要返香港喇！」