阿嬌月經失調孱過阿Sa

蔡卓妍（阿Sa）因胃部不適，昨日只得鍾欣桐（阿嬌）獨自出席活動，阿嬌原來健康不比阿Sa好，中醫指她肝的排毒功能很差，月經失調，調理不好分分鐘變癌！

阿嬌、古巨基、陳法拉、陳敏之、周汶錡和周麗淇（Niki）等昨日出席活動。原本Twins齊出席，但因阿Sa腸胃不適臨時缺席，阿嬌說：「阿Sa依家攬住個廁所。」談及阿Sa一向腸胃多問題，阿嬌表示她經阿Sa介紹下看同一個中醫：「中醫話我身體仲差過阿Sa，肝排唔到毒，好似畀垃圾塞住咗，排唔到出嚟。仲話我月經嚟得少，遲啲會愈嚟愈多，到時血崩連用尿片都唔夠。」阿嬌問中醫情況是否似坐月，對方答類似，再問到可會有癌？中醫又答她類似。阿嬌現時服了個多月中藥，睡眠質素得以改善。

至於Niki將長髮剪短，準備以新形象歐遊，但問到過氣緋聞男友鄭嘉穎與內地女星穎兒約會，Niki表示一向不關心別人的新聞，更指嘉穎是時候快些結婚。問到兩人可有聯絡？她說：「你話呢！」至於是否再見不是朋友？抑或根本沒有再見？Niki表示工作上碰過一次面，亦承認無綫曾想兩人再合作，她表示視乎劇本和時間，不介意與任何人合作。

法拉去諸葛婚宴

另外，法拉被問到會否買結婚賀禮送給諸葛紫岐？她說：「呢啲唔講啦！」至於會否出席諸葛本月20日的婚宴？她淡然說：「唔……我會去嘅。」對於被指新劇中的鍾無艷化妝不夠醜，法拉表示不介意再醜，反而是監製認為是合家歡時間，怕太醜觀眾看得不舒服。