城城出力護Lynn 見家長挽危情

近日有傳「富黛戀」告急,熊黛林(Lynn)更被拍得素顏殘爆現身鬧市,又借微博挽救感情,料不到相隔數天,劇情竟峰迴路轉!城城昨日首次公然開腔護Lynn後,又即晚見女友家長,實行以連串行動補鑊!

郭富城與熊黛林(Lynn)拍拖多年一直保持低調,即使多次被撞破「好事」,他亦從未正式給予「城嫂」名分,近日更有傳已屆適婚年齡的Lynn為令關係盡早浮面,多次隔空施壓,豈料弄巧反拙,逼得這段五年多的「富黛戀」出現裂痕!連日來,Lynn為情消瘦,被拍得冇厘神氣地在鬧市穿梭,又在微博力挽狂瀾,感觸寫上:「可以回到從前嗎?」面對女方多招催淚攻勢,城城終於心軟回頭,他昨日與Janice Man出席浪琴錶活動時,首次開腔護Lynn護出面,公然打救受盡委屈的女友!

結婚一定公開

記:記者 城:郭富城

記:同Lynn係咪分手?

城:知大家好關注我嘅感情生活,不過我向來感情世界好低調,可能低調所以引起揣測!最近有好多關於我同Lynn嘅報道,喺某啲報道上面,佢都幾委屈吓,希望大家畀啲空間我同Lynn,畀我哋可以正常發展!

記:你哋係咪分手?

城:已經講晒,其他唔講喇!

記:依家正常發展緊?

城:係!

記:你咁低調會唔會低調結埋婚?

城:我唔想咁高調講我嘅感情世界,呢個係我本身嘅性格問題,唔關任何人事。

記:係咪之前講吊墜嗰度有啲摩擦?

城:唔講。

記:你頭先話Lynn邊方面受委屈?

城:唔使講咁多喇!

記:你點補償佢?

城:就係叫你哋畀啲空間我囉!

記:點解佢嗰日會咁講?(Lynn強調和城城是朋友關係一事)

城:因為有啲報道令佢委屈。

記:係咪就係話你否認送吊墜畀佢?

城:唔係!總之呢個圈有好多報道都令人好尷尬囉!

記:仲可以叫Lynn做天王嫂?

城:唔講太多喇!

記:係咪即係雨過天青冇事喇?

城:總之現階段工作行先,感情事順其自然,我知大家好關心我,我都唔係小朋友,可以做嘅就係維護我身邊嘅異性朋友,畀多啲空間我,等我可以喺良好嘅環境下處理我嘅感情生活,總之結婚我就會公開,我都希望大家衷心祝福我,我係傳統嘅男士,一定會成家立室,但係請畀啲時間我!

記:依家你哋係咪向住結婚方向發展?

城:唔知!

記:Lynn係咪你結婚對象?

城:要諗諗!今次覺得作為朋友,長時間有唔真實報道對佢造成委屈,要企出嚟保護佢!

恤靚髮會情郎

當再被問到二人是否已言歸於好時,城城笑個不停,今次他這招英雄救美,定必令Lynn甜入心!

另一邊廂的Lynn接受電話訪問時說:「感情事順其自然,多謝大家關心!」而獲愛郎挺身力撐的她於昨午五時半風騷到中環恤個靚髮,心情靚靚的她逗留了兩個小時。對於城城的「護Lynn宣言」,她說:「仲未睇到報道唔回應!」當提及城城表示結婚會公開時,她呆了一呆,其後駕車約於八時返家,逗留不夠十分鐘便離開,與父母前往城城經常去的灣仔富聲酒家,三人心情靚爆,其母更向鏡頭揮手,問到是否約了城城見家長?她沒有回應,卻甜笑默認。據悉,「富黛」經常到此酒家撐枱腳,今次應是城城安排「家庭飯局」補鑊!

第一手消息請下載on.cc東方互動iPhone/iPad/Android Apps

專案組

城城在活動上滔滔不絕開腔護女友,Lynn聽後想必冧到爆!

城城「護Lynn宣言」一出,氹得Lynn甜笑不停!

Lynn聽到城城表示結婚時會公開,即時嚇到呆。

Lynn偕父母到城城經常去的酒家見家長,心情靚爆,風騷揮手。