娜姐自踩演技 睇到打冷震

「宅男女神」周秀娜最近主攻電影圈，她笑言睇自己做戲睇到「打冷震」，演技有待改進，難怪今次拍《紫荊俠》搏到盡，除學電單車，還希望親身上陣拍打戲。

早前因拍戲擦傷大腿的周秀娜，昨日偕組合Bro5出席活動，雖然腳傷未愈，但仍穿短褲大騷長腿，十分貪靚。曾透露為拍戲會考電單車牌的娜姐，昨日表示已報名學車：「已經報咗名，所以一定要考到！因為拍戲需要揸電單車。」又透露媽咪亦有電單車牌：「我細個成日坐媽咪電單車尾陪佢出去買嘢，所以我學電單車，媽咪都唔會擔心，佢仲叫我考到牌之後要兜番佢一轉！」問到會否擔心再受傷？她說：「拍戲有意外在所難免，我希望動作場面都可以親身上陣。（買重保險？）相信劇組會買。」

主力拍電影的娜姐期望演技有所改進，她大讚《第84屆奧斯卡金像獎》出爐影后梅麗史翠普相隔30年，憑《鐵娘子—戴卓爾夫人傳》再奪影后，可見對方演技精湛。

問到自覺演技如何？她笑說：「以前唔係咁敢睇，會有啲尷尬，但後來跟老師學演技要睇番。同事同朋友都話我一部好過一部，我睇親自己做戲就打冷震！」

呻拍拖似湊仔

另外，娜姐揚言目前最想演慘情的角色，又大呻平日跟男友陳偉成（Avis）拍拖似湊仔：「啲人成日都覺得我好硬朗，其實我都想畀人照顧吓，我同男友一齊嘅時候，都係我照顧佢多啲。」