卓韻芝喪揈錢：唔知做緊乜

即將33歲的卓韻芝當年入行不久，已是炙手可熱的DJ，而且瓣數多多，編、導、演、寫作及棟篤笑乜都做，吸金力超強，但背後卻變成購物狂「大花筒」，乜都喪買！

當年13歲考入電台，直至中五會考收到成績單，望到分數後正式加入電台做嘢，一做就15年，DJ係我第一份工，亦係奠定我性格、催逼我思考嘅地方，係另一個屋企。

17歲時做節目，做緊「墳墓時間」，但創咗較好收聽率，公司畀張Additional嘅約我簽，寫住我新嘅人工，當時人工暴升，我唔肯要，仲喊添！因為好驚，覺得突然間畀咁多錢我，實唔係好嘢，我話唔會簽，仲同公司講話畀番依家個人工，我會繼續做原本嘅本分，我已經畀晒所有力，係冇得嘔Extra，再嘔畀埋條命你。

錢多生恐懼

第二日公司搵一個前輩同事以另一個方法叫我簽，佢解釋好耐，話呢個人工畀到我更加舒適嘅生活，當時我又喊，係嚟自恐懼，覺得唔會係好事！阿媽成日叫我唔好欠人嘢，所以唔簽，亦唔敢講畀屋企人聽，到最後同事說服我，佢講咗句嘢好正：「我哋負責畀張紙你簽，假若你唔簽我哋要孭鑊，唔知點同上頭交代，點解一份約都搞唔掂！」跟住我就簽咗。

以當時年歲計，真係搵得好多，生活好好，係跳級生活，之前捱緊飯盒麵包，一夜之間已經可以去酒店食Brunch。起初唔敢使錢，只係想買嘢畀家人，但一兩年後習慣咗，反而變得大使，成為超級購物狂，瘋狂程度係有次去北京食飯，一坐低要晒人哋原Set枱櫈返香港，仲要畀現金，三個月之後寄到嚟，但張枱同櫈蛀蟲，畀阿媽鬧足一個禮拜：「你睇你亂使錢，屋企邊有位擺？又要攞去杜蟲，枱櫈同其他傢俬又唔襯，張櫈攝唔入枱下面。」

今世貴人多

嗰兩年日子，貪得意買嘢，好愚昧，啲衫着唔落都夾硬買；鞋都唔會買啱Size，總之鍾意就要擁有，嗰時有拍拖，但冇人理我，乜都買一餐，但自己生活仍然係攞緊MD機、聽緊CD、睇番嗰啲書。過咗兩年，20歲出頭，慢慢發現啲嘢冇意義，錢同快樂冇任何關係，其實唔知自己做緊乜，又唔係快樂咗，最後發現最鍾意係創作。好感激出道至今身邊嘅貴人，有朋友陪我占卜，話我前世係村長，幫咗好多人，所以呢世多貴人。