GaGa迷廉署告狀 Jeana幫口嗌嘔飛

「百變天后」Lady GaGa首個香港演唱會前日正式發售門票，有歌迷懷疑有人扣起公開發售門票導致出現炒賣情況，昨日拉隊分別到廉署及消委會報案，連將到日本睇GaGa騷的Jeana亦幫口：「如果真係有人扣起啲飛，希望佢攞番出嚟！」

將於5月2、3日舉行的Lady GaGa首個香港演唱會《The Born This Way Ball Starring Lady GaGa》，連日來激發「Ga迷」搶飛熱外，更出現炒飛猖獗情況，連警方商業罪案調查科都介入，聯絡主辦單位了解。直至前日演唱會正式公開售票，估計扣除信用卡優先訂購的6千張飛外，預計餘下共兩場有約逾萬張門票，但售票處卻宣布全部門票於個半小時內售罄，令在場歌迷極度不滿！

排隊4日食白果

昨晨呻白等4日3夜的藍先生相約其他5位撲空歌迷到油麻地廉署及消委會報案，他說：「我向其他區嘅歌迷了解過，佢哋全部20幾籌即止步，全部都買唔到飛，聽佢哋講上網又買唔到，我哋計過全港29個售票處一齊賣飛，冇可能咁快賣晒，除非有人扣起啲飛，根本就冇咁多飛攞出嚟賣。」問到投訴的目的何在？他們說：「佢哋最好畀番飛我哋買，冇飛就出嚟同我哋交代清楚啲飛去咗邊，我哋一定追查到底。」藍先生和黃小姐獲廉署接納案件後，再獲消委會接受投訴。至於主辦單位發言人至截稿前未有回覆。

張敬軒勸冷靜

對於Fans到廉署及消委會求助，模何佩瑜（Jeana）說：「希望ICAC真係幫到佢哋手！如果真係有人扣起啲飛，希望佢攞番出嚟，再畀歌迷排隊買過啦！」但她不打算撲飛，因緋聞男友La Ying已答應請她到日本睇GaGa的騷。而陳奕迅（Eason）女兒陳康堤是GaGa歌迷，其母徐濠縈稱Eason已為家人訂了幾張飛，得知一票難求，故已告之老公不會幫其他人訂飛。談及有Fans到廉署舉報，她未有發表意見。至於張敬軒則勸到廉署投案的歌迷勿衝動，但他明白主辦商一定要預留門票給客戶及贊助商。