鄭嘉穎獲高層開路 紅館戰林峯

前晚的英皇春茗星光熠熠，除容祖兒、謝霆鋒及Twins外，無綫視帝鄭嘉穎亦有出席並宣布加盟，與林峯成為同門歌手，更即時落嘴頭希望首踏紅館開騷！一山藏二虎，連英皇高層吳雨亦笑言叫嘉穎挑戰林峯，雙生大戰一觸即發！

同是無綫人氣小生及樂易玲愛將的林峯與鄭嘉穎，先後被英皇羅致旗下，據知二人均簽約5年，林峯當年的加盟費是5百萬元，而「新豬肉」嘉穎則袋走3百萬元。二人「勢力」各據一方，林峯年初憑《Chok》勇奪金曲金獎，並3度當選亞太區最受歡迎香港男歌星，而嘉穎則兩奪視帝！

據知，嘉穎的劇酬是每集25萬元人民幣（約30萬港元），而林峯則是15萬元人民幣（約18萬港元）；但電影方面，經驗較多的林峯片酬約70萬元，屬影壇新貴的嘉穎則是50萬元。另外，曾在紅館開騷的林峯，歌酬約為70萬元一場，而嘉穎則從未踏足紅館，據知英皇已打算為他於6、7月推出頭炮國語專輯。

打造歌影代表作

前晚嘉穎在英皇集團舉行的春茗上宣布加盟，並跨過巨型電視布景板登場，他直言很「恨」在紅館開騷：「好開心加盟英皇，我好鍾意唱歌，想有首代表作。」吳雨送上8號球衣，寓意他練跑準備紅館個唱，並說：「一直好賞識佢，喺電視風靡萬千觀眾，只欠一首成名曲，答應你打造一首全球都紅嘅歌。」嘉穎打蛇隨棍上：「我電影都好似冇代表作。」吳雨即承諾：「楊先生（楊受成）話開部電影畀你。」向來錫嘉穎錫到燶的樂易玲，上台後囑吳雨好好照顧愛將：「英皇係好好碼頭，有私人飛機、遊艇。」吳雨即搞爛Gag說：「唔使畀幾百蚊，仲有錢搵！嘉穎你落去取代林峯，佢走咗，你坐佢個位，坐到尾。」全場爆笑。

唔敢染指亞太獎

事後嘉穎繼續落嘴頭：「希望英皇完成小弟心願，有自己成名曲，喺紅館開騷係每個歌手嘅心願，開到就冇遺憾，依家一步步嚟！」問到是否Chok住唱，他笑說：「Chok方面我認輸，我企番喺度唱，跳舞唔係強項，我希望有突破，但唔好要求跳到似郭富城。（取代林峯？）吓！邊個講o架？（吳雨囉！）佢講笑，真係唔好信佢。阿峯嘅地位冇人取替到，各自各精彩，你好我好大家好。」問到會否染指亞太區最受歡迎香港男歌星獎，他說：「有代表作先，十畫未有一撇，等我攞歌曲獎先。（爭金曲金獎？）唔係咁嘅意思，依家為錢工作，唔可以話為興趣咁清高。電影方面希望同葛優合作，邊個唔想拍好電影？」