諸葛紫岐嘉年華婚禮 老公四圍撲牡丹

名模諸葛紫岐與未婚夫薛嘉麟將於下月20日拉埋天窗，婚禮籌備得如火如荼，昨日她開始派發親自設計的別致請帖及嫁女餅，請帖有卡通肖像站在3D結婚蛋糕上，富童話色彩！

諸葛紫岐（Marie）與Neway二太子薛嘉麟的婚禮進入倒數階段，忙於籌備人生大事的Marie已全面停工，昨日開始派請帖及嫁女餅，請帖盡顯Marie的心思，打開時兩人的卡通肖像在兩層的3D結婚蛋糕上彈起，既驚喜又有睇頭，Marie說：「張請帖係我設計，好鍾意彈出嚟嘅感覺，而且用粉紅色，好似童話世界咁，公仔係我有個畫漫畫好叻嘅Fans送畀我，佢畫得好似，連主席（薛嘉麟）塊面有粒墨都知。」Fans果然愛屋及烏！

賓客爆晒

Marie表示婚禮實在有太多事情要處理，因為親戚朋友多，現在還未定到圍數，她說：「爆晒人，依家睇吓有冇得減少。（會唔會考慮擺兩日？）一定唔會！我依家忙緊到時用乜音樂、燈光顏色、小食、酒水等，因為有好多內地親戚朋友，好多都好飲得，所以有好多唔同類型嘅酒，50、60度嘅內地烈酒都有。有啲阿姨又想我幫佢哋揀衫，佢哋想着得特別啲。」至於婚禮主題，Marie要求童話式，她說：「嗰日會用牡丹花，因為我好鍾意牡丹，但依家唔係牡丹季節，主席努力搵緊，個婚禮我想童話式，要好熱鬧，好似嘉年華咁。」