卓韻芝錫晒外婆：好彩死唔去

6年前卓韻芝（阿芝）因憶亡母成狂企圖尋死，最終獲救，登上港聞頭條。事過境遷，阿芝坦言「好彩死唔去！」並表示會將所有能量寄託在年邁的婆婆身上，以「溝女形式」與婆婆相處！

依家同82歲嘅婆婆一齊住，我要用「溝女形式」對住佢，有時返屋企會同佢講：「你電到個頭好靚呀！」唔好以為咁老就唔受，總之係女人就受！平時我會帶佢去玩，我覺得老人家需要身體接觸，例如拖住佢隻手、搭佢膊頭、翹住手行街，甚至送花畀佢，等佢有種拍拖感覺。

阿婆開微博

婆婆以前去過加拿大同挪威，一個老人家去過北歐都算幾激，近年我同佢去啲近嘅地方。我要感激一位舊男友媽咪，我哋住得近，如果我要出埠或遊學，Auntie會照顧婆婆，仲約佢游水。我啲男同性戀朋友都好錫婆婆，佢哋成日上去搵佢傾偈，我婆婆仲有玩微博，個名叫「卓韻芝阿婆」！

有時我做嘢好攰，返到屋企要扮冇嘢，但婆婆一眼睇得出，然後問我：「你今日係咪唔開心？」跟住我忍唔住喪喊，佢唔會講好多嘢，只會攬住我，只係愈攬我愈喊得犀利。當年自殺後，明白有好多人關心自己，我覺得好彩死唔去！嗰時喺醫院返屋企後，婆婆只係不停煲嘢畀我飲，到依家都係乜都冇講，真係唔好睇小老人家嘅人生智慧！

笑聲憶亡母

平時做嘢幾忙都要陪婆婆！我哋會去買餸，最叻只係去中環飲茶，天氣啱嘅話，間中會行山，佢依家行動都OK，但曾經試過連三個橙都拎唔到，喺我去倫敦讀書期間，佢身體一夜之間變差，令我覺得冇可能完成課程，一定要返嚟。依家有冇諗起媽咪？梗係有！好小事就會諗起，例如我嘅笑聲同媽咪好似，有時笑完以為佢喺度笑。有冇喊？間唔中都有，但喊係多謝佢，或者問「點解你唔喺度呢？如果嚟睇我個騷咪幾好！」依家會將所有能量寄託喺婆婆身上，搵開心嘅人生。