阿姐捍衞娘家 宗澤子珊撐硬

身為無綫「鎮台之寶」的汪明荃為捍衞「娘家」，昨日向王總「還擊」，指無綫根基厚「唱」唔衰：「佢係一間新公司乜都未有，做出成績先講啦！依家講乜都冇用！無綫做到今時今日嘅地位，係『唱』唔衰o架！你見亞視做咁耐都佔唔到收視就知啦！新台招兵係啱，我都想佢做得好，佢話年底有劇出吖嘛，我都想睇係乜嘢！」至於無綫一班親生仔、女如黃宗澤（Bosco）、徐子珊和謝天華亦力挺無綫好處多多。Bosco表示，無綫是他入行第一份工，歸屬感驅使他不容外間詆毀無綫這個金漆招牌：「我飲TVB奶大，我服務咗無綫十年嘞！身為無綫人，我覺得出到去絕對受到重視及尊重，好處又多，好似我哋無綫人出去做騷叫價都高啲！無綫個名都馨香啲啦！早年我都有機會同胡杏兒喺內地拍劇，自由度一樣好高，好多發展機會！」

樂易玲：唔係互揭瘡疤

徐子珊則說：「我由冇人識到選港姐入無綫，依家咁多Fans，都係無綫帶畀我，又畀機會我出去拍電影，其實無綫藝人自由度好高啫！」「Laughing哥」天華更強調沒有無綫給他機會拍到《學警狙擊》及《潛行狙擊》這些好劇，他的人氣就不能如今日般提升。而無綫高層樂易玲面對王維基於「自己地頭」將軍澳動土兼被挑釁，忍不住「暗寸」王總：「做娛樂係百花齊放，唔係互揭瘡疤，觀眾係鍾意睇好戲，唔係睇呢啲（揭瘡疤），佢動土我恭喜先，但我都要同所有台前幕後講，魚唔過塘唔肥，唔爭就唔吃香，我都希望佢哋真係『肥』到，其實我最高興係見到余慕蓮簽咗『城電』，到呢個年紀都可以有機會發揮！（接受『回頭草』？）世界係圓，我哋有大台風範，亦有容人之心！」