黃日華張可頤寸爆TVB

有「電訊魔童」之稱的城市電訊主席王維基率領無綫「四大叛將」包括黃日華、張可頤、林文龍和廖碧兒踩入無綫位於將軍澳工業邨的「地盤」，為城市電訊電視及多媒體製作中心進行動土，王維基更帶領眾無綫叛將「大合唱」唱衰TVB：「我哋唔係工廠，亦唔會用亞加力膠當玻璃，亦唔會拍來拍去都係爭產劇。」

城市電訊投資六億港元興建電視及多媒體製作中心，昨午進行動土及拜神切燒豬儀式，向來主意多多的王維基竟然與城電「一哥」黃日華齊齊舞獅助興。他致詞時寸爆無綫：「依家起緊係我哋嘅家，大家見證緊電視業嘅新世代，我哋唔係工廠，呢度係科技、藝術嘅結晶，依家有十個劇本籌備緊，我哋唔會用亞加力膠做玻璃，會用實景拍攝。」

唔會得兩三條橋

昨午動土儀式時下着毛毛細雨，王維基說：「今日有啲涼，唔知係風生水起，定王維基搞風搞雨。」其後受訪時繼續寸無綫：「三月底將開拍歌舞劇，今年會拍十幾套劇，題材好多元化，唔會拍來拍去都係爭產，來來去去嗰兩三條橋。」他揚言繼續招兵，問到會否斟洽陳志雲，他說：「同佢係朋友，但唔知佢肯唔肯，但係機會係人創造嘅！」

他雖然稱邀得一百四十位藝人簽約加盟，但昨日出席的藝人只有十多位，包括前無綫藝員黃日華、張可頤、林文龍、廖碧兒、元華、姜大偉、駱應鈞和周家怡等，歌星則有劉美君和關楚耀，場面談不上星光熠熠。

「一哥」黃日華接力繼續鬧無綫，他說：「我上星期先簽約，簽咗一套科幻偵探片，七、八月開，班底全部都識，王生畀好多自由度，新環境發揮更大。」談到被稱為叛將，他則說：「我哋唔係叛將，係開國功臣先啱！」其後他以金句形容城電CTI：「Can Do Independent。」他的金句雖讚城電可讓大家獨立發展，但卻將其縮寫錯改成「CDI」。華哥又爆老友苗僑偉應該與王維基洽談過，但人各有志，苗僑偉現時還與無綫有約。

自由度大有誠意

專程由內地返港撐場的城電「一姐」張可頤，下半年與劉美君及譚耀文合作拍劇：「呢度自由度大啲，休息時間夠，王生亦好有誠意。」她指為無綫拍罷的《天梯》不知何時才有「出頭天」。

簽約兩年的林文龍也指城電自由度大，可讓他接拍內地劇，問到會否與太太郭可盈夫妻檔演出？他說：「短期內唔會，個女就嚟要搵學校。」前無綫金牌編審張華標以嘉賓身份出席，他支吾地透露已簽約城電，但開工日期未定，現在正着手籌備台灣的劇本。