戚黛黛玩老虎機贏到暈

戚黛黛早前到加拿大旅遊，趁機到賭場一試運氣，但入場時卻被職員懷疑「唔夠秤」，懷疑她未夠21歲要出示證件，令她哭笑不得，戚黛黛對職員說：「我成30歲人喇！」

亞視藝員戚黛黛，早前與家人返加拿大將外公骨灰運回港兼順道旅遊，她說：「外公其實過咗身十年，因為嗰邊已經冇晒親戚，冇人拜祭，所以今次專程將外公骨灰接返香港。」

狂擦美食體重升

此行到加拿大，戚黛黛也到賭場一試運氣：「入場嗰陣畀職員懷疑我唔夠21歲，要檢查我證件，我成30歲人喇！真係畀佢激死。之後玩老虎機贏咗千幾二千蚊，但係一路玩一路覺得好頭暈，雖然贏錢，但係感覺怪怪哋，都唔敢再玩落去。」

戚黛黛還與家人探望朋友，趁機放肆大吃大喝，體重應聲上升：「喺嗰邊日日食西餐好肥，好快已經肥咗幾磅，返港又要努力減肥。」雖然與朋友敍舊增磅，但總算有得着，她說：「有個長輩幫我睇相，話我最遲38歲一定嫁得出，2014、2015年都有機會，媽咪聽到都知仲有排，但總算有個期限，所以都冇再煩我搵男朋友。」

近期戚黛黛忙於為節目《微播天下》開工，她說：「節目講吓啲娛樂圈新聞，又講吓煮嘢食，自己都八卦，鍾意睇娛樂雜誌，又鍾意研究吓食譜，所以做得好投入。」