馬國明認拍過拖 胡定欣寸博宣傳

馬國明跟胡定欣從未公開承認戀情，不過馬明不忍女友被批公主病及貪錢而被「飛」，故自爆二人曾拍拖1年並和平分手，但護花之情反遭定欣質疑博宣傳！

傳過與胡定欣復合又分手的馬國明（馬明），被指難頂胡定欣公主病及貪錢識富豪而提出分手，馬明心痛女友被「唱」，不惜自爆與定欣早於2010年演出節目《舞動奇跡》時開始拍拖，但最後因性格不合，在沒吵架情況下分手，再見亦是朋友。

昨日馬明接受本報電話訪問時笑說：「我哋性格上唔係好夾。（佢太進取？）我係隨遇而安嘅人，可能Timing唔啱，所以和平分手，依家我哋Keep住做好朋友。我今次講係想澄清定欣唔係公主病，唔係我飛佢。佢係好女仔，我哋有約食飯，你哋影到唔出奇，因為我哋都仲係緋聞情侶！（復合？）將來嘅嘢唔知！」

結婚先公開

二人昨日前後腳現身電視城，定欣被追問舊情時笑說：「佢講就問番佢啦！（尷尬？）唔會，都係朋友。（拍咗一年拖？）私人嘢私下處理，我要到結婚嗰刻先會公開。（馬明忍咗好耐先講？）哈哈，我懷疑佢借我嚟宣傳，不過佢套新劇《On Call 36小時》收視好好啦！（嬲？）嬲O架！」至於提到令定欣生氣並被質疑博宣傳，馬明說：「下次唔講囉！」