Jeana掛住撲飛 胃炎入院

Lady GaGa開騷令全城陷入撲飛熱，「不倒胸」何佩瑜（Jeana）前晚返內地打碟開通頂，昨晨仍打算排隊買飛。未知是否操勞過度，加上食無定時，她臨出門前突然又屙又嘔，全身標冷汗，與她同居的模韋彤即陪她到樓下診所求醫。可惜Jeana病況急轉直下，診所人流如鯽，韋彤即急Call白車。

昨午2時20分，Jeana被分流到廣華醫院後，一度要靠吸氧氣幫助呼吸，緋聞男友La Ying飛車趕往醫院。臥病在床的Jeana等候醫治時痛苦難當並發出呻吟聲，La Ying即撫摸Jeana髮鬢。Jeana證實患上急性胃炎，其後記者致電Jeana，她表示已返家休息，服藥後已無大礙：「我成日捱夜加上食辣嘢，搞到個胃差咗。（撲唔到GaGa飛感失望？）都冇辦法，身體緊要，香港睇唔到，La Ying話同我去日本睇！」此外，諸葛紫岐、琦琦和歐陽妙芝表示未能於昨日買到門票，眾人表示正想辦法撲飛，但諸葛紫岐指不會買黃牛飛。