超盈撲GaGa門票 碌友情卡

Lady GaGa五月襲港開騷，圈中人各出奇謀搶購個唱門票，王賢誌與林忠豪分別大手掃入40張和30張，賭王四房千金何超盈和李彩華亦有收穫！

百變天后Lady GaGa將於5月2日在香港亞洲博覽館開騷，掀起城中話題和撲飛潮，由昨日至25日憑AE信用卡，可優先透過網上、電話和通利琴行買飛，27日門票才公開發售。圈中不少GaGa迷出盡法寶撲飛，王賢誌昨日聯同朋友冒雨排隊，並將「戰利品」放上微博，他在電話中透露跟朋友共買了40張飛︰「我同幾個朋友喺大角咀排隊買，上星期搵咗住附近嘅朋友排隊，到今日7點幾去會合朋友，我就有12張，會同家人睇。（放上微博惹人妒忌？）唔係晒嘢，只係慶祝。」

超雲嗌「救命」

狂掃30張最貴$1,580門票的林忠豪則表示要80張飛︰「好多朋友託我買飛，所以未夠，太多朋友鍾意佢，佢係國際巨星，值得嘅。」

而賭王四房千金何超盈亦擁有10張門票，她強調是託朋友得來的︰「唔係屋企人畀我。（有指何家有300張飛？）我唔知其他人有幾多。（超欣都係Fans，會一齊睇？）未必，因為佢5月未必有假。」三房千金何超雲則在微博大叫「救命」︰「可不可以別再問我拿Lady GaGa演唱會門票？我真的沒有，我不想五月前就因為輻射不幸離世啊！」而李彩華與Angelababy經理人Kim分別買入6張和2張門票。

此外，昨日不少市民排隊撲飛，在灣仔排頭位的梁先生表示由周一以一百元時薪請人幫忙排隊，而劉姓一家人早上7時前來排隊，並希望以倍半價錢將門票出售。另有排隊黨早於21日開始在尖沙咀排隊直到27日等待門票公開發售。